СО ТАЙ КРЕСТЬЯНА ВӦСНА «ТӦЖДЫСЬЫСЬЫД»!

Ноябр тӧлысьын Айкатылаӧ воліс Госпароходствоысь представитель Трегубов вӧчны договор Айкатыла берег улысь пес лэптыны вылӧджык. Пессӧ лэптаныс вӧлӧма 1000 сажень кымын. Договорсӧ вӧчны чукӧртлас юралысьяссӧ потребительскӧй лавкаысь, инвалиднӧй кооперативысь да Всеработземлесысь. Трегубовыс вӧлӧм сетӧ быд кубическӧй сажень пес лэптӧмысь 1 шайт да кызь ур. Епоса юралысь пырысьтӧм-пыр жӧ лэдзас донсӧ 1 шайт да 15 урӧдз. Инвалиднӧй кооперативса юралысь эськӧ шуӧма жӧ: оз пӧ ков донтӧ чинтыны, ставнымлы пӧ тырмас пестӧ катлыны. Сӧмын Епоса юралысьыд эз кывзы, лэдзис донтӧ 80 урӧдз.

Та вылӧ колӧ ёнджыка видзӧдлыны мӧда-мӧдлы отсасян комитетлы да став татшӧм уджъяс вылас договорсӧ вӧчавны ӧтнаслы. Колӧ нин сылы узьӧмысь садьмӧдчыны. Крестьяналы бур нажӧтка некор оз лолы, кутасны кӧ договоръястӧ вӧчигад донсӧ лэдзны.

Чӧжӧ.