«ЛУЧШЕ МЕНЬШЕ ДА ЛУЧШЕ» ГИЖӦД ВЫЛӦ

(«Югыд туй» 233-ӧд номерын)

Обласьтувса Войтырӧс велӧдан юкӧд школаясӧ шогмытӧм карандашъяс ыстӧм йылысь висьталӧ: карандашъяс вӧлі ньӧбӧма Мӧскуаысь 846 дюжина 3525 шайт дон. Мӧскуасяньыс карандашъяссӧ ыстӧма вӧлі уездувса Войтырӧс велӧдан юкӧдъясӧ веськыда. Ньӧбис карандашъяссӧ Мӧскуаысь Уллянаса Сельскокӧзяйственнӧй Техникумысь велӧдысь Иевлев. Сылы ньӧбигас вӧлі петкӧдлӧмаӧсь бур сорт карандаш, а ыстӧмаӧсь магазинсяньыс некытчӧ туйтӧмӧс. Кор обласьтувса Войтырӧс велӧдан юкӧд тӧдмаліс та йылысь, пыр жӧ гижис уездувса Войтырӧс велӧдан юкӧдъяслы, мед найӧ лёк карандашъяссӧ оз видзны, а магазинас гижис: онӧ кӧ пӧ бӧр босьтӧй тайӧ шогмытӧм карандашъястӧ, лоӧ заводитны суд пыр перйыны. Тайӧ лунъясӧ сэсянь воис юӧр телеграммаӧн: лёк карандашсӧ пӧ бӧр босьтам да сы пыдди пӧ ыстам мӧд пӧлӧс карандашъяс.

Войтырӧс велӧдан юкӧд чайтӧ, мый регыд позяс вежны омӧль карандаш бурджыкӧн, кӧть и этшаджык лоӧ. Дерт кӧнкӧ, лоӧ мыйкӧ мында убытка, да кор сійӧ кутас тыдавны, корсьны лоӧ мыжасӧ суд пыр.

В. В. Юкӧдын ӧтувтан удж нуӧдан п/о Тимушев.