ПАЛЬСА ПОТРЕБИТЕЛЬСКӦЙ ОБЩЕСТВОЛӦН ВОСЯ УДЖЫС

Потребительскӧй обществолӧн уджыс колян во серти бурмис. Дерт, эмӧсь на омӧльторъяс, да сӧмын сійӧ ньӧжйӧникӧн пыр бырӧ.

Потребительскӧй обществоын уджсӧ таво нуӧдісны куим правленньӧса шлен да медалӧм тшӧтӧвод. Общӧй собранньӧыс шленъяслӧн вӧлі нёльысь. Во чӧжӧн шленӧ пырис 185 морт. Правленньӧлӧн собранньӧясыс пыр вӧлі ӧтлаын ревизионнӧй комиссиякӧд.

Вося барышсьыс основнӧй капиталӧ торйӧдӧма 85 прӧчент. Правленньӧса шленъяслы уджалӧмысь мынтӧм вылӧ мунӧма став оборотсьыс 3 прӧчент кымын.

Унджык тӧварсӧ вӧлі ньӧбалӧма уджӧн вексельяс улӧ. 45 прӧчентсӧ став тӧварсьыс ньӧбӧма Обсоюзлысь, государствоса вузасянінъясысь 30 прӧчент, мукӧд кооперативъясысь 22 прӧчент да частнӧй вузасьысьяслысь ньӧбӧма 3 прӧчент. Ньӧбӧм дон вылас вузалігас тӧвар вылӧ содтӧдыс вӧлӧма 15 прӧчент. Став тӧварсьыс шленъяслы вузалӧма 40 прӧчент. Шленъяслы ньӧбӧм тӧвар вылӧ вӧлӧма 5 прӧчент скидка. Тӧварсӧ судзӧдӧма кадӧн, сӧмын сьӧмыс потребительскӧй обществоыслӧн этша да, йӧзыслы тырмымӧн абу вермӧма судзӧдлыныс.

Потребительскӧй общество крестьяналысь ньӧбалӧма картупель, вый, кучикъяс, звер куяс да мукӧдтор. Став крестьяналысь ньӧбӧмторсӧ потребительскӧй общество вузавлӧма Обсоюзлы. Сэсся потребительскӧй общество Госпароходстволы лӧсьӧдӧма 900 куб. пес 7500 шайт дон. Став пессӧ лэдзисны потребительскӧй обществоса шленъяс. Сэсся тулыснас крестьяналы удждылӧма кӧйдыс 1000 пуд дай сёян нянь уджӧн сетлӧма 100 пуд кымын жӧ.

Потребительскӧй обществолӧн эм Емваса пӧрӧда ӧш да куим йоркшир пӧрӧда порсь. Порсьпиянсӧ разӧдӧны шленъяс пӧвстын. Ӧш дінӧ мӧсъясӧс вайӧмысь босьтӧны 20 урӧн. Сэсся эм

прокатнӧй пункт.

Видз-му уджалан машинаяс пиысь медъёнасӧ крестьяна пӧльзуйтчӧны кӧйдыс весалан машинаӧн да шабді вӧчан машинаӧн (льномялка). Шленъяслы тулыс кежлӧ потребительскӧй общество ваяліс уна пӧлӧс кӧйдысъяс.

Тӧваръяс видзны да вузасьны потребительскӧй общество стрӧитіс аслыс керка. Сэтчӧ петіс 1700 шайт гӧгӧр. Пристаняс тӧвар улӧ да ветлысь-мунысьлы овны бара стрӧитіс кык помещенньӧ.

Йӧзӧс югдӧдан удж.

Эм ичӧтик библиотека. Судзӧдӧ бура уна газетъяс: «Югыд туй», «Коми Сикт», «Безбожник», «Кооперативнӧй путь», «Беднота» да мукӧд пӧлӧс. Пионер чукӧрлы судзӧдӧ журналъяс, газетъяс.

Колӧ содтыны паевӧй взнос.

Омӧльторйыс потребительскӧй обществоын со кутшӧмъяс: шленъяслӧн паевӧй взносын пыр на 3 шайт. Медбӧръя общӧй собранньӧ вылас лэптылісны сёрни 5 шайтӧдз паевӧй взносъяс содтӧм йылысь, да шленъясыс мыйлакӧ эз сӧгласитчыны. Колӧ тайӧ сёрнисӧ регыдджык бара кыпӧдны да взноссӧ лэптыны 5 шайтӧдз.

Сэсся потребительскӧй обществолӧн зэв этша оборотнӧй капиталыс. Унджык капиталыс куйлӧ бергӧдчытӧг (овмӧсас). Сы вӧсна правленньӧлы да ревизионнӧй комиссиялы колӧ чинтыны кӧзяйственнӧй уджсӧ. Дерт, дзикӧдз дугдыны сійӧ уджысь оз позь, а колӧ зільны восьтыны сельскокӧзяйственнӧй кооператив да уджсӧ сетны сэтчӧ. Потребительскӧй обществолы сӧмын колӧ крестьяналы судзӧдны донтӧм тӧвар да крестьяналысь вузаланторъяссӧ ньӧбны донӧнджык. Сэсся приказчикыс общӧй собранньӧ тшӧктытӧг сетавлӧма тӧвар уджӧн. Учётъяс дырйи оз судзсявны да ыстысьӧны сы вылӧ, уджӧн пӧ сеталім да эз на пӧ мынтыны. Тадзтӧ он вермы гӧгӧрвоны: збыльысь приказчикыс сеталӧма уджӧн али ачыс видзӧма. Та вӧсна ревизионнӧй комиссиялы тшӧкыдджыка колӧ видзӧдлывлыны лавкаса удж вылӧ.

Пайщик.