ПАЙ МЕЗДІС

Сиктса кооператив — крестьяналӧн асланыс киӧн вӧчӧмтор. Деревня зэв нин бура гӧгӧрвоис: ӧткӧн олігӧн, торйӧн-торйӧн уджалӧмӧн он вермы кыпӧдны овмӧстӧ, он вермы лӧсьӧдны сідзи, медым овмӧсыд ыджыдджык доход сетіс.

Мыйкӧ кӧ он вермы ӧткӧн-ӧткӧн вӧчны — унаӧн зэв кокньыда артмас. Кутісны ӧтувтчыны, восьтісны кооператив тӧварищество. Овны быттьӧ кокньыдджык нин лои. Кооператив кутіс вузавны видз-му уджалан кӧлуй, лӧсьӧдіс прокатнӧй пункт, судзӧдіс обществолы вартан машина. Весиг уджӧн кутіс сетавны видз-му уджалан кӧлуй да кӧйдыс. Сюсьджык да вежӧраджык йӧз ёна пондісны вӧдитчыны асланыс кооператив пыр: вузавны мый лишалӧ — нянь, вурун, кудель — да судзӧдны быдтор, мый колӧ кӧзяйствоӧ, — ставсӧ вӧчӧны кооператив пыр. Найӧ вылӧ видзӧдӧмӧн кооператив дінӧ матыстчисны и мукӧд — первой кооперативысь, полысьяс, бӧрвылас весиг «невернӧй помаяс» кыссисны, ропкигтырйи, уджӧн босьтасьны. Шлен лои уна. Колӧ эськӧ быттьӧкӧ тадзинад содны да паськавны кооперативлы. Но мыйкӧ зэв тешкодь кутіс артмыны — кооператив чинны да омӧльтчыны мыйлакӧ кутіс. Мужикъяс пондісны шуасьны: омӧля пӧ кутіс кооперативным воддза серти уджавны. Кӧйдыс эз тырмы быдӧнлы, тӧвар чиніс, мый он юав — сійӧ и абу. А уджӧн сетӧм йылысь вывті нин лёк лои. Войдӧр вӧлі локтан — пырысь-пыр и сетасны. Ӧні кутшӧмкӧ ӧчередь лӧсьӧдӧмаӧсь, дай сетӧны муртса-муртса, кӧть эн босьт.

Шызисны шленъяс: правленньӧ некытчӧ туйтӧм! Аслыныс быдтор эм, миянӧдз налы мог абу!

Чукӧртісны собранньӧ. Видісны да видісны, ёна и мыськисны. Бӧрйисны выль правленньӧ, пуктісны меддошлӧйяссӧ да горлопанъяссӧ.

Коли тӧлысь-мӧд. Кооперативлӧн уджыс ещӧ омӧля кутіс мунны. Сикт кузя быдсяма сёрни мӧдіс: «Пом!..» «Эштіс!..»

— Шулім тай ми... кыдз пӧ позьӧ та ыджда уджӧ кутчысьны!..

Бара чукӧртісны собранньӧ. Кутісны юасьны правленньӧлысь:

— Мыйла тадзи вӧчсьӧ? Мый понда уджыс пыр ӧтарӧ кутіс киссьыны?

Правленньӧ висьталӧ: деньга пӧ абу. Ветлім пӧ карӧ да, эз сетны: важ уджйӧзнытӧ пӧ мынтӧй, шуисны, — онӧ кӧ пӧ мынтӧй — судӧн перъям.

— Кыдз оз сетны? Мыйла оз сетны? — горӧдісны шленъяс. — Кутшӧм пӧ сідзкӧ тайӧ сӧветскӧй власьт, оз кӧ кӧсйы крестьяналы отсыштны? Мыйла нӧ эськӧ кӧсйысьлісны отсавныс кооперативсӧ лӧсьӧдігас?

— Став шленыс миян 270 морт, быд шленлы колӧ вӧлі пуктыны пай 3 шайт; паевӧй капитал эськӧ сэки лои 810 шайт. Миян эм пуктӧм капиталыс сӧмын 200 шайт, весиг шайтӧн морт вылӧ оз во. А паевӧй капитал саяс, ёртъяс, ставыс и эм. Быд организация сьӧм удждігӧн медвойдӧр видзӧдӧ, эм-абу паевӧй капиталыд, ыджыд-ӧ сійӧ, став шленыс-ӧ ӧкуратнӧя пуктӧмаӧсь пайнысӧ. Аддзанныд кыдзи: кооперативыдлысь вынсӧ мерайтӧны паевӧй капитал сертиыс. Ми эськӧ со абу нин ӧкуратнӧйӧсь да, сэн на ещӧ государство уджӧн сетіс кооперативнымлы 6.000 шайт. Тайӧ сьӧмыс, дерт, кытчӧсюрӧ эз разав — тіянлы жӧ, шленъяслы, удждӧма. Вот, ёртъяс, тані миян мӧд беда лои: ті уджӧнтӧ босьталінныд, видзинныд асланыд кӧзяйстволы пӧльза вылӧ, а кор мынтан срокыс воис — ті и вунӧдінныд кооперативад туйсӧ. Уджӧн разӧдӧма 6000 шайт, мынтісны бӧр сӧмын 1.500 шайт. Унджыкыс тіян костын вӧлӧма омӧль мынтысьысьяс. Правленньӧныдлысь дӧверитӧмсӧ ті энӧ вештӧй.

— А сійӧ — сідз, Степан Ёгорович!

— Кывзӧй водзӧ. Миян кооператив, медым паськыдджыка вермис бергӧдчыны, босьталӧ видзӧм вылӧ сьӧм, шусьӧ вкладӧн. А кодкӧ нӧ тіян костысь пуктіс эз кооперативӧ сьӧмсӧ?

Тані торкисны висьталысьӧсь, лыбис ыджыд шум:

— Ещӧ мыйкӧ оз-ӧ ков? Сьӧм сылы ковмӧма.

— Сьӧмыд ӧд миян оз на туплясь, сьӧкыда лоӧ перйыныс.

— Сетан кӧ сьӧмтӧ, этша нин сэсся тіянлысь босьтан.

— Сійӧ вот и эм, — вевттис шумсӧ Ёгор Степан аслас гӧлӧсӧн. — Ті поланныд сьӧмнытӧ сетны асланыд кооперативлы, онӧ веритчӧ сы вылӧ. Кыдзи нӧ сэсся позьӧ корны, мед государство сетас кооперативыдлы сьӧмсӧ, шленъясыс кӧ сылы оз веритны, полӧны сетныс, ассьыныс чӧжыштсьӧм сьӧмторсӧ? Тадзи ёртъяс, оз позь. Асьныд ті гӧгӧр мыжаӧсь, оз ков и бокысь сэсся корсьысьны. Кооперативыд миян сійӧн и киссьыны кутіс, мыйла некод сылы уджӧн оз сет, абу дӧверйӧыс. Дӧверйӧсӧ воштінныд сылысь ті асьныд, мыйла этша сетінныд пайнытӧ. Кооперативыд киссьыны кутіс ещӧ и сійӧн, мыйла онӧ срок кежлӧ мынтӧ водзӧса сьӧмнытӧ, уджйӧзнытӧ. Сэсся ті асьныд жӧ ӧні петкӧдлінныд ассьыныд кооперативлы веритчытӧмлуннытӧ, энӧ кӧсйысьӧ пуктыны сэтчӧ кӧть ичӧтика ассьыныд сьӧмнытӧ — вкладтӧ.

Дерт, тадзи кӧ шленъясыд кутасны видзӧдны кооператив вылад, некор сійӧ оз вермы бурджыка уджавны босьтчыны, оз вермы сетны некутшӧм пӧльза. Некодӧс и мыждыны сыысь, асьнымӧс кындзи. Кытчӧ нинӧм эн пуктыв — нинӧм и корсьны. «Мый кӧдзан — сійӧ и вундан».

— Мый нӧ эськӧ ӧні вӧчны? — шыасисны кодсюрӧ.

— Ми сы понда и чукӧртчим, мед сёрнитны бура да тӧдны, мый вӧчны. «Мый вӧчны» — ті юаланныд? Первой висьталӧй: колӧ али оз тіянлы кооперативыс?

— Овсяс на и сытӧг, — кымынӧнкӧ шуисны.

— Кодлы овсяс, кодлы и пикӧ воны лоас. Копрасьны-кевмысьны ковмас мунны купеч ордӧ, — бара кодсюрӧ шуисны.

— Кооперативтӧг миянлы некыдз оз позь! Веськыда колӧ шуны — асьным ми рӧзӧритім кооперативнымӧс; босьтны — ставным босьталім, мынтыны мыйӧн ковмис — некод абу, ставным бокӧ вешйим.

Медуна гӧлӧсыс лои кооператив кольӧдӧм вӧсна.

— Вай гиж, — шуис Ёгор Степан секретарлы. — Гиж, мый собранньӧ шуис кооператив видзны, кыдз сійӧ лоӧ крестьяналӧн зэв колан организация. Сэсся водзӧ гиж тадзи: «Кооператив ёнмӧдӧм кузя да медым сійӧ вермис паськыдджыка бергӧдчыны, собранньӧ шуис ыдждӧдны сылысь паевӧй капиталсӧ; сы понда быд шленлы содтыны пайсӧ...» Кымын шайтӧдз?

— Витӧдз, — унаӧн горӧдісны.

— Этша, — шуис Ёгор Степан. — Дасӧдз! Витнад он мын, сійӧ этша. Вайӧ артыштамӧй: 10 шайтӧн кӧ шлен вылӧ, миян капитал лоӧ 2700 шайт. Сы вылӧ миянлы сельскокӧзяйственнӧй банк уджӧн сетас 20.000 шайт да сэсся асланым Союз уджӧн пондас сетны 25 сюрс шайтӧдз кымын. Вот сэки миян уджыд и вӧрзяс водзӧ. Асьныд ті лыддьӧй, ёртъяс, мый ыджда миян нуждаыс. Уналӧн вӧлыс абу, мӧскыс, уджалан кӧлуйыс. Сэн ещӧ стрӧитчыны колӧ. Шуны кӧ, зэв уна сьӧм колӧ. Энӧ вунӧдӧй, ёртъяс: миянлы сьӧм сэки сетасны унджык, кор чукӧртам ыджыд паевӧй капитал. Сытӧг нинӧм и сёрнитны.

— Коді тӧждысьӧ, мед кооператив бура уджалас да отсалас кыпӧдны крестьяналысь кӧзяйствосӧ, — сылы аслыс колӧ песовтчыны да пуктыны пай дас шайт. Сэсся татшӧм пайсӧ кӧ пуктам, ті асьныд бурджыка кутанныд видзӧдны кооперативса удж вылас, матӧджык сы дінӧ сибӧдчанныд. Собранньӧяс вылӧ ӧкуратнӧяджык понданныд волывлыны дай суседъяс бӧрсьыд кутанныд видзӧдны, мед сійӧ удждӧм сьӧмсӧ мыйсюрӧ вылӧ эськӧ эз видзны да мед срок кежлӧ мынтісны. Медым кокньыдджык вӧлі мынтыныс, позьӧ унджык пельӧ сроксӧ юкны.

Здук мында некод нинӧм эз шу. Быд шлен ас костас арталіс-мӧвпаліс, кыдзи бурджык. Сы бӧрын сэсся кутісны кияснысӧ лэптавны вочасӧн. Унджыкыс лэптіс 10 шайта пай вӧсна. Ӧткымын морт сӧмын шыасисны паныд — озыръяс, кодъяслысь ӧтувъя бур олӧмыс деревняад вывті ёна векньӧдӧ горшсӧ.

Та бӧрын собранньӧ вылын зэв гажа лои — сёрнитӧны, мургӧ толькӧ керка пытшкӧсыс. Быдӧн быттьӧ мӧда-мӧдыслы матынджык лоины. Ставныс гӧгӧрвоисны — талун вӧчисны ыджыд удж.

Кодкӧ горӧдіс:

— Но, Степан Ёгорович, пуксьы председательӧ сэсся!

Ӧтвылысь сэні мурӧстісны:

— Вернӧ! Кыпӧд кооперативнымӧс!

— Ёртъяс! — шуис воча Ёгор Степан. — Сійӧ абу куш ме сайын — тіян сайын. Тіян отсалӧмӧн быдтор кокньыд вӧчны.

— Дерт сідз, отсалам! Заводитім кӧ, ого нин ӧні бӧрыньтчӧй!

Собранньӧ тупкӧм бӧрын дыр на эз разӧдчыны крестьяна, ёна на сёрнитісны талунъя бур удж вӧчӧм йывсьыс.

Пантуев.