ВӦЛӦСЬТУВСА БЮДЖЕТ СЕРТИ РӦСКОД ВӦЧӦМСӦ ВИДЗӦДӦНЫ АСЬНЫС КРЕСТЬЯНА

Воддза вояс серти таво вӧлӧсьтувса бюджет ёна содтӧма. Таво вӧлӧсьтувса овмӧссӧ нуӧ ачыс вӧлӧсьтыс, аслас бюджет сертиыс. Вӧлӧсьтувса бюджетлӧн медколанторйыс — медым эськӧ сійӧс вӧлі веськыда видзӧма (рӧскодуйтӧма).

Этша на ӧд бюджеттӧ бумага вылад гижӧмыд, кутшӧм доход да рӧскод воӧ пасйӧмыд. Колӧ сійӧ бюджетсӧ збыльысьсӧ, олӧмас вӧчны. Медым эськӧ быд ур вӧлі видзӧма сэтчӧ, кытчӧ шуӧма бюджетыс. Ӧти-кӧ, тайӧ. Мӧд-кӧ, колӧ уджсӧ сувтӧдны сідзи, мед эськӧ сьӧмсӧ кытчӧсюрӧ эз лотайтны.

Та вӧсна колӧ пыр видзӧдны вӧлӧсьтувса бюджетсьыс рӧскод вӧчӧм вылас, колӧ лӧсьӧдны контроль.

Кодлы нӧ эськӧ позьӧ тшӧктыны видзӧдны вӧлӧсьтувса бюджет сертиыс рӧскодуйтӧмсӧ? Народнӧй финанс комиссариат шуліс: вӧлӧсьтувса финансъяс (сьӧм) рӧскодуйтӧм вылас пӧ мед видзӧдісны асьныс вӧлӧсьтса крестьянаыс. Крестьянаыслы аслыныс колӧ тӧдны, кыдзи лӧсьӧдӧма вӧлӧсьтувса бюджетсӧ, збыльысь-ӧ сьӧмсӧ видзӧны кытчӧ колӧ.

Ставсоюзса Сӧветъяслӧн 3-ӧд съездыс индіс медбур видзӧдысьсӧ (контрольсӧ), вӧлӧсьтувса ревизионнӧй комиссияӧс. Тайӧ комиссияыс бӧрйыссьӧ вӧлӧсьтувса Сӧветъяс съезд вылын. Татшӧм комиссияясыс эмӧсь нин Украинаын дай асланыс уджнас петкӧдлісны коланлунсӧ.

Сы вӧсна Сӧветъяс Союзса народнӧй финанс комиссариат лӧсьӧдіс ӧні проект ревизионнӧй комиссияяссӧ став СССР пасьта бӧрйыны.

Тайӧ проект сертиыс, ревизионнӧй комиссияясас бӧрйӧны вӧлӧсьтувса Сӧветъяс съезд вылын куим мортӧс дай кык кандидатӧс. Бӧрйӧны мӧд съездӧдз.

Комиссияӧ шленъяссӧ дай кандидатъяссӧ позьӧ бӧрйыны волсӧветса шленъяс пиысь, позьӧ бӧрйыны мукӧд крестьянаӧс. Сӧмын оз позь бӧрйыны волисполкомса шленъясӧс, исполкомса мукӧд удж нуӧдысьясӧс.

Бӧрйысьӧм ревизионнӧй комиссияясыс кутасны видзӧдны: 1) медым сьӧмсӧ вӧлі рӧскодуйтӧма веськыда бюджетас индӧм серти да вӧлӧсьтувса съезд тшӧктӧм серти. 2) Медым бура да выгӧднӧджык сувтӧдӧма вӧлі вӧлӧсьтувса овмӧссӧ. 3) Медым лючкиа вӧчӧны рӧскодсӧ, лючки нуӧдӧны сьӧм книгаяссӧ, документъяссӧ.

Тайӧ вӧлӧсьтувса ревизионнӧй комиссияяссӧ лӧсьӧдӧмыс бура сувтӧдас вӧлӧсьтувса бюджет рӧскодуйтӧмсӧ. Сэсся ревизионнӧй комиссияяссӧ крестьянаӧн асьнысӧн бӧрйӧмыс ещӧ нин найӧс матыстас обществоса овмӧс бердӧ, крестьяна лючки вермасны видзӧдлыны, кутшӧм найӧ вӧлӧсьтын бюджетыс, кутшӧма шогмӧны, путьмӧны бӧрйӧм йӧзыс вӧлӧсьтувса овмӧссӧ нуӧдан уджас.

Е. К-в.