БИӦ СЬӦМНЫТӦ ЭНӦ ШЫБЛАЛӦЙ!

Стрӧитӧй сотчытӧм деревня. — Лӧсьӧдалӧй сотчытӧма стрӧитчан тӧвариществояс. — Быд воӧ сотчӧны стрӧйбаяс миллион шайт дон.

Миян Сӧвет республикаын быд воӧ сотчӧ 220 сюрс крестьянскӧй керка. А йӧзыс содӧ вонас миллион да джын (1.500.000) морт. Татысь тыдалӧ, кутшӧм ыджыд нужда сиктъясын керкаясысь.

Быд воӧ стрӧитсьӧ 700 сюрс выль керка (двор). Сӧмын стрӧитчӧны пыр на важ моз — стрӧитсьӧ вывті сотчана деревня.

Колӧ стрӧитны сотчытӧм, здоровӧй, бур деревня. 350 миллион шайт видзӧны крестьяна стрӧитчӧм вылӧ быд воӧ. Та мында сьӧм вылас кӧ эськӧ крестьяна стрӧитчисны бур ногӧн, ӧтувтчӧмӧн, позис эськӧ лӧсьӧдны зэв мича выль сиктъяс. Сӧмын ӧд стрӧитчӧны ӧткӧн-ӧткӧн; дерт, тадзнад бур деревня он вермы лӧсьӧдны.

Ӧні став республика пасьталаыс эм сӧмын 300 крестьянскӧй сотчытӧма стрӧитчан тӧварищество (рочӧн — крестьянские товарищества огнестойкого строительства), ӧтувтӧма 23 миллион крестьянскӧй кӧзяйство. Тайӧ вывті на этша. Но и налы нин сӧветса правительство сетӧ ыджыд отсӧг: куш ӧтик воӧн тайӧ 300 тӧвариществолы казнасянь лэдзӧма 100.000 шайт мынтытӧм вылӧ (безвозвратно) да сетӧма уджӧн миллион да сё сюрс (1.100.000) шайт. Таысь кындзи, Видз-му Комиссариат аслас тшӧт вылӧ стрӧитӧма 35 губерняын 300 керка, медым крестьянаыс видзӧдласны да тӧдны кутасны, кыдзи колӧ стрӧитны выль деревня.

Сотчытӧма стрӧитчан тӧвариществояслы ньӧти дон босьттӧг (бесплатно) сетсьӧны став мастерскӧйясыс, кирпич вӧчан и мукӧд пӧлӧс заводъяс, кодъяс кольліны войнаӧдз важ сэтшӧм организацияяслӧн.

Унджык кӧ эськӧ вӧліны татшӧм тӧвариществоясыс миян, ёнджыка вермис эськӧ и государство отсавны деревнялы стрӧитчыны. Государствоса отсӧг сорнад эськӧ регыд вермис лоны миян республикаын выль, кустарнӧй деревня.

Лӧсьӧдалӧй татшӧм тӧвариществояссӧ, ӧтувтӧй на пыр сьӧмнытӧ да стрӧитӧй выль деревня!

И. Ф—н.