КИТАЙ ОЗ ПАДМЫ — МУНӦ ВОДЗӦ
Лунысь лунӧ Китайын лоӧмторъяс гырсялӧны да паськалӧны. Лунысь лунӧ Китайса нэм нартитӧм йӧз ӧтувтӧмӧн кыпӧдӧ ассьыс вынсӧ. Лунысь лунӧ Китайса уджалысь йӧз мӧда-мӧдыскӧд ёнджыка ӧтувтчӧны паныд сувтны не толькӧ бокӧвӧй капиталист государствояслы, но и ас нартитысь генералъяслы.
Китайса телеграфнӧй агентство висьталӧ: Сунь Чуаньфан (бокын вӧлі сулалӧ) да народнӧй армияяс (юралӧ Фэн Юйсян) ӧтувтчӧмаӧсь паныд мунны Чжан Цзолиньлы да У Пэйфулы.
Тайӧ ыджыда водзӧ тувччӧм китайса йӧзлӧн капиталистъяс нартитӧмысь мездысьӧмын. Кымын регыд уджалысь йӧз Китайын ӧтувтчасны ас костын да пондасны паныд мунны асланыс мутитысь йӧзлы, Чжан Цзолинь кодьлы да У Пэйфу кодьлы, сымын регыдджык кутасны вермыны вӧчны олӧмсӧ ас ногыс да вӧтлыны бокӧвӧй капиталистъясӧс.
Сьӧкыд вӧтлыны бокӧвӧй капиталистъясӧс, сьӧкыд и венны нартитысь генералъясӧс. Неважӧн ӧтик америкаса паракод вӧйтӧма посни китайса паракодъясӧс, кытӧні вӧлӧмаӧсь салдатъяс (Центральнӧй правительстволӧн). Кыдзи позьӧ видзӧдны та вылӧ? А сідз, мый Америкалы абу нимкодь Фэн Юйсянлӧн воча мунӧм У Пэйфулы. Татшӧм и водзӧ лоӧ — кымын кутасны венны У Пэйфуӧс, сымын ёнджыка кутас нартитны ас кинас Америка, а кутасны кӧ венны Чжан Цзолиньӧс, сэк Япония сідз жӧ босьтчас тойлыны Китайӧс.
Татшӧмторъяссӧ вӧлі тӧдӧны китайса йӧз водзысянь, сӧмын татшӧмторъясыс эз падмӧдны сійӧс. Китайса уджалысь йӧз мунӧны водзӧ — асьнысӧ мездӧны бокӧвӧй нартитысьясысь.
Ӧні лоӧ висьтавны У Пэйфу йылысь. У Пэйфу кольӧм воӧдз вӧлі юралӧ Пекинын. Кор заводитчис чорыдджык кось У Пэйфулӧн Чжан Цзолинькӧд, сэк Фэн Юйсян (вӧлі командуйтӧ первой армия вылын) изменитіс У Пей-Фулы да шыбитіс У Пэйфуӧс Пекинысь. Сы бӧрти У Пэйфулӧн вошлі выныс. Ӧні америкаса сьӧмӧн (видзӧд бӧръя «Коми сикт» номеръяс) ёнмис да сувтіс паныд Чжан Цзолиньлы. Ми тайӧс лыддям Америкаӧс Япониякӧд вензьӧмӧн. Генерал У Пэйфу сэтшӧм жӧ ставленник Америкалӧн, кутшӧм Япониялӧн Чжан Цзолинь. Сӧмын выныс налӧн абу ӧткодь да У Пэйфуыс эз на виав бӧръя вонас рабочӧйясӧс, кыдз Чжан Цзолинь, а толькӧ грӧзитіс.
