КРАСНӦЙ КРЕСТ ОТРЯДЛӦН ТӦЛЫССЯ УДЖ

Мылдін вӧлӧсьтӧ (Кулӧмдін у.) воліс Краснӧй крестсянь отряд лёквисьӧм лечитны. Удж нуӧдысьяс отрядас вӧліны докторъяс Палей да Бреслинскӧй. Уджалісны найӧ Мылдін вӧлӧсьтын ӧти тӧлысь. Тайӧ тӧлысьнас вӧчлісны найӧ уна собранньӧ дай крестьяна костас ёна сёрнитісны висьӧмъяс йылысь.

Крестьяна костас уджсӧ нуӧдісны сиктъясӧ ветлӧмӧн да быд керкаысь висьысьясӧс видлалӧмӧн. Вӧлӧсьт пасьтаыс видлалісны став йӧз пытшсьыс прӧчент 60 саяс (быд сё морт пытшкысь 60 морт). Видлалігас пыр уджаліс ӧти мылдінса нывбаба. Видлавнысӧ удайтчис сӧмын гӧгӧрвоанаджык йӧзсӧ. Мукӧдыс эз сюрны асланыс пемыдлуныс вӧсна.

Видлалӧм пытшсьыс сюрӧма лёквисьысьыс 10 прӧчент кымын. 3,2 прӧчент висьысьыслӧн висьӧмыс самӧй вуджана кадас.

Сэсся отрядыс Мылдін вӧлӧсьтӧ организуйтіс Краснӧй крест ячейка. Сійӧ ячейкаас шленӧ пырисны морт 40 кымын. Лёквисьӧмкӧд водзсасьны да сійӧс бырӧдны ячейкаас шленӧ пырисны 30 кымын нывбаба.

Надейтчам, мый найӧ кутасны бура уджсӧ нуӧдны гӧгӧрвотӧм йӧз пытшкын. Лечитчысь йӧз шуӧны: тӧдчӧмӧн пӧ ми кутім бурдны висьӧмысь, кутам пӧ пыр водзӧ лечитчыны.

Висьталам бур удж нуӧдӧм вылӧ ыджыд аттьӧ докторъяслы Палейлы да Бреслинскӧйлы, да ещӧ обисполкомлы крестьяналы отсалӧм вылӧ.

Капля.