СТРАХОВКАЫД АБУ ВОТ

Коми крестьяналысь уналыськодь кывлывлан: со пӧ государство пыр шуӧ, «единӧй налог» — ӧти пӧлӧс вот. Ӧти пыдди пӧ тай уна на лоӧ. Шуам, страховка. Кыті нӧ пӧ сійӧ абу вот. Вот моз быть жӧ лоӧ мынтыны.

Вот страховкаысь ёна торъялӧ. Вот босьтсьӧ государствоса став нуждаясыс вылӧ: Гӧрд армияӧс видзӧм вылӧ, школаяс вылӧ, учрежденньӧясӧс кутӧм вылӧ, сідз водзӧ.

Страховкаыд дзик мӧдтор. Сійӧс государствоыд дзик ньӧти ас вылас оз видз, сійӧ ставыс мунӧ аслыныс жӧ крестьяналы, лоӧ кӧ налӧн кутшӧмкӧ причча. Сэсся Госстрах сійӧ сьӧм вылас (кольӧ кӧ крестьяналы сеталӧм бӧрын) отсалӧ пӧжар кусӧдан кӧлуйяс лӧсьӧдавны сиктъясын.

Унаӧн крестьяна пиысь чайтӧны: гашкӧ пӧ, миян нинӧм нем виччысьтӧмыс оз ло. Нинӧм пӧ и босьтны миянлысь страховкатӧ. Гашкӧ вылад надейтчыны оз позь, гашкӧ вылӧ государство оз надейтчы. Государство аддзӧ, кыдзи воысь воӧ уна керка крестьяналӧн сотчӧны, уна скӧт усьлӧ, уналаын шер жугӧдлӧ кӧдзаяс — дай сы вӧсна и лӧсьӧдіс страховка.

Страхӧвӧй сьӧмтӧ государство лыддьӧ дзик торйӧн. Сэсся Госстрах лыддьӧ дзик торйӧн быд крестьянинлысь, мыйта сылысь босьтӧма страховка, медым тӧдӧ вӧлі, уна-ӧ ковмас сетны крестьянинлы, суас кӧ сійӧ овмӧсын, скӧт пӧвстын нем виччысьтӧмтор. Вотад татшӧм торъя лыддьӧмыс абу.