МЫЙ ВЕРМАС ВӦЧНЫ НЫВБАБА МӦДА-МӦДЛЫ ОТСАСЯН КОМИТЕТЪЯСЫН
Сиктъясын олысь пиысь джын мындаыс кымын лоӧны нывбабаяс. Гӧлиник нывбабалы, дӧвалы, Гӧрд армияӧ мунысь гӧтырлы либӧ ӧтка бабалы, кодлӧн мужикыс мунӧма кытчӧкӧ уджъяс вылӧ, медунаысь лолӧ шыасьлыны отсӧгла общество дінӧдз. Кӧзяйствосӧ кӧ нуӧдӧ нывбаба мужикъясӧн отсавтӧг, налы кӧ кутшӧмкӧ кадӧн уджсӧ вӧчны он отсав, сылӧн кӧзяйствоыс пыр ӧтарӧ гӧльмӧ. Крестьянкаыд сідзтӧ вермас веськавны кулаклы кипод улас. Сылы сідзтӧ лоӧ сетны мусӧ арендаӧ, ачыс уджавнытӧ оз вермы да. Мукӧддырйиыс эськӧ и эм крестьянкаыдлӧн уджалысьыс, да видз-мусӧ уджалан кӧлуйыс нинӧм абу, кӧйдысыс абу. Сэтшӧм крестьянкаясыдлӧн бара жӧ кӧзяйствоныс ёна гӧльмӧ. Мӧда-мӧдлы отсасян комитет татшӧм нывбабаясыдлы вермӧ сетны ыджыд отсӧг, медся нин ёна вермас сетны, эм кӧ комитетас тӧлка уджалысь крестьянка.
Крестьянкаяс гӧгӧрвоисны нин нывбабаяслысь мӧда-мӧдлы отсасян комитетъясын уджалӧмсьыс бурлунсӧ, зільджыка нин пырӧны сэтчӧ уджавны. Колян бӧрйысигас мӧда-мӧдлы отсасян комитетъясӧ веськалі нин 14 прӧчент нывбаба (100 морт вылӧ 14 нывбаба).
Кутшӧм комитетъясын эмӧсь нывбабаяс, сэні ӧдйӧнджык отсалӧны гӧль кӧзяйствояслы. Уналаын нин комитетъясас уджалысь нывбабаяс пырыс тӧдмалісны гӧль олӧмсӧ дӧваяслысь да вӧвтӧм йӧзлысь. Унджыкыслы тӧдмалӧм бӧрын удждісны кӧйдысъяс, отсалісны муяс вылын уджавны, лӧсьӧдісны налы тӧв кежлӧ пес.
Комитетъясын уджалысь крестьянкаяс зільӧмӧн дӧваяслы, ӧтка нывбабаяслы да гӧрдармееч гӧтыръяслы кооперативъясӧ пыригӧн сетӧны кокньӧдъяс, отсалӧны гожӧмын уджавны. Комитетъясын уджалысь крестьянкаяс сиктса йӧз отсӧгӧн вермисны восьтыны кык сюрс саяс посни челядь оланін гожӧм кежлӧ. Уналаын челядь оланінъяссӧ колисны тӧв кежлӧ. Мукӧдлаын найӧ лӧсьӧдалісны вурсян мастерскӧйяс. Мастерскӧйясас донсӧ босьталӧны частнӧй мастерскӧй дорысь этшаджык, а дӧваяслы да гӧль крестьянкаяслы вурсьӧны дон босьттӧг. Дон босьттӧг жӧ велӧдӧны вурсьыны том йӧзӧс.
Зэв ыджыд отсӧг комитетъясын уджалысь крестьянкаяслы сетӧны делегатскӧй собранньӧяс. Делегатскӧй собранньӧяс вылын крестьянкаяс мукӧдсьыс водзджык тӧдмасисны, кыдзи колӧ уджавны мӧда-мӧдлы отсасян комитетъясын.
Мӧда-мӧдлы отсасян комитетъясын уджалысь крестьянкаяс аслас уджнаныс петкӧдлісны — комитетъяс медъёна кыскӧны крестьянкаясӧс обществоса уджас.
Тайӧс некодлы оз ков вунӧдны мӧда-мӧдлы отсасян комитетӧ бӧрйысигӧн. Нывбабаӧс комитетӧ уджавны кыскыны — медводдза удж. Крестьянкаяс асланыс уджнас комитетъясын лэптасны мӧда-мӧдлы отсасян удж. Локтӧй, коми крестьянкаяс, мӧда-мӧдлы отсасян комитетъясӧ, уджалӧй сэні!
Мастюкова.
