НЫВБАБАЯС, УДЖАЛӦЙ КООПЕРАТИВЫН!

Кооперативнӧй удж вылын миян коми аньяс омӧля на уджалӧны. Кооператив правленньӧясын, ревизионнӧй комиссияясын нывбабаыд ёна на этша. СССР пасьта бӧрйӧм уджалысьяс пиас нывбабаыс сӧмын 2,7%. Став шлен письыс кооперативын нывбаба шленыс сӧмын на 23,6%. Миян Коми обласьтын нывбабаыд кооперативын шленын куим сюрс сайӧ на. Мужчина шленыс миян кызь ӧти сюрс сайӧ. Сідзкӧ быд 100 шлен пиын нывбабаыс сӧмын 14 морт шленас. Став нывбаба дінад кӧ пуктан кооперативсьыд куим сюрс шлентӧ, лоӧ зэв на этша (став нывбабаыс миян 67616 морт).

Таво колӧ миян унджык кыскыны кооператив уджас нывбабаӧс. Колӧ делегатскӧй собранньӧяслы, нывбаба костын удж нуӧдысьяслы водзвыв думыштны, кодӧс эськӧ пыртны, бӧрйыны правленньӧӧ, коді сэні первой прӧстӧй правленньӧса шленӧн, уджалӧмӧн вермас во мысти лоны председательын, удж нуӧдысьын. Бӧрйыны колӧ честнӧй мортӧс, кодлы эськӧ веритӧны мукӧд шленыс. Кооперативад правленньӧас колӧ эськӧ джынсӧ нывбабаӧс бӧрйыны — 50%.

Кор кутас правленньӧын уджавны бӧрйӧм нывбабаыд, сэки миян кокниджык лоӧ нывбабаястӧ кыскыны шленӧ кооперативъясад, сэки миян ӧдйӧджык кутас содны нывбаба шленыд.

Нывбабатӧ кооператив бердад матыстны позьӧ сӧмын сэки, аддзӧ кӧ сійӧ кооперативыслысь бурлунсӧ. Тшӧкыда сёрниӧ волан да, крестьянкаыд шуӧ: «Лавкаас пӧ миянлы нинӧм абу да, мый пӧ сэтчӧ шленас пырӧмысь. Деньгатӧ пуктан да, приказчикыд зептас сюяс дай». Тайӧ, дерт, крестьянкаыд прӧста оз шу. Сійӧ аддзӧ, вель уналаын на кооперативтӧ лотайтӧны. Колӧ тайӧ лёкторсӧ вужсяньыс чышкыштны. Кытӧні приказчикыд оз судзсьы, колӧ пырысьтӧм-пыр сетны судӧ.

Колӧ лӧсьӧдны лавкаясад пельӧсъяс, кытчӧ пуктавны медся колан тӧвар сикассӧ мамлы да кагалы дай вузавлыны сійӧс ас донсьыс (накладнӧй рӧскодсӧ пуктытӧг). Сэтшӧм пельӧсъяс йывсьыс сёрнитӧны ёна, сӧмын ӧнӧдз на сёрниӧн и кольлі. Весиг сэтшӧм пельӧсыс Сыктывкарса лавкаын на абу. Вочӧжся барышсӧ юкигӧн колӧ сьӧмсӧ сетыштны нывбаба журналъяс судзӧдӧм вылӧ, кооперативъяслысь посни книгаяс вылӧ. Колӧ юкыштны гожӧм кежлӧ челядьясӧс видзанін лӧсьӧдӧм вылӧ. Сідзи кӧ кооперативъясыс вӧчасны, ми регыдджык вӧчам делӧ вылын Ленин ёртлысь шуӧмсӧ: «Нывбабалӧн олӧмыс кокнялас, лоӧны кӧ найӧ кооперативса шленынӧсь».

Нывбабаяслы шленӧ пырӧмсӧ кооперативъяслы колӧ кокньӧдны. Дерт, мужиклӧн дай нывбабалӧн паевӧй взносыс лоӧ ӧткодь; сӧмын сетны колӧ сэтшӧм кокньӧд: нывбабаыс мед мынтас паевӧй взноссӧ вочасӧн, оз эськӧ пырысьтӧм-пыр пыригас.

Босьтчыламӧй ӧтув нывбабалы висьтавлыны кооперативлысь бурлунсӧ, кыскамӧй найӧс кооперативӧ!

Канева.