КУЛАК ВЫНЛЫ ВОЧА СУВТАМ
Гӧль крестьяна, ӧтувтчӧй шӧркоддьӧма крестьянакӧд!
Таво тулыснас партиялӧн 14-ӧд Ставсоюзса конференцияын ёна лючкиа лӧсьӧдіс сӧвет власьтӧн сиктын удж нуӧдӧмсӧ. Медым эськӧ бурджыка кыптіс крестьяналӧн овмӧсыс, лэдзӧма паськыдджыка видз-му арендаӧ босьтӧм, паськӧдӧма медалӧмӧн уджӧдӧм, сетӧма кустаръяслы кокньӧдъяс налог боксянь. Тайӧс ставсӧ сэсся сюйӧма олӧмӧ ставсоюзса Сӧветъяс 3-ӧд съезд вылын.
Кыдзи таво нуӧдіс партия уджсӧ сиктын? Кутшӧм удж лои нуӧдӧма? Сӧветъяс ловзьӧдӧм; кӧзяйствоса дай политика уджӧ беспартийнӧй гӧль да шӧркоддьӧма олысь крестьянаӧс кыскӧм; шӧркоддьӧма олысь крестьяна овмӧслы отсалӧм; крестьяна овмӧслы кыптыны паськыд туй сетӧм. Со кутшӧм уджъяс нуӧдӧма партияӧн сиктын. Татшӧм политикасӧ (удж нуӧдӧмыслысь сямсӧ) партиялысь эз на быдӧн лючки гӧгӧрвоны, весиг ӧткымын партийнӧй крестьянаяс. Мукӧд крестьяна гӧгӧрвоисны сідзи, тайӧ пӧ партия бергӧдіс ассьыс уджсӧ кулакъяс дор.
Збыльысьсӧ эськӧ партия некор на эз вунӧдлы гӧль крестьянаӧс. Быд ногӧн зільліс дай зільӧ ёнмӧдны сылысь овмӧсса дай политикаса вынсӧ.
Неважӧн Центральнӧй Комитетса пленум индаліс вель уна туйяс гӧль крестьяналы отсалӧм вылӧ. Пленумыс аслас постановленньӧясын шуис: партия пӧ сиктын уджсӧ нуӧдны кутас ӧнія ног жӧ. Партия пӧ оз бергӧдчы революция первойя вояс уджсямӧ — кулакъясӧс лёкысь личкӧмӧн бырӧдӧм уджӧ.
Тадзи шуӧм кындзи, партия воддза моз ещӧ на индӧ гӧль крестьяналы, кутшӧм туйӧн эськӧ сылы венны кулакъяслысь вынсӧ. Сійӧ туйыс — ӧтувтчӧм кӧзяйствоӧн дай политика уджӧн. Партия торъя нин ёна шуӧ — тайӧ кӧзяйственнӧй дай политическӧй ӧтувтчӧмыс пӧ гӧль крестьяналӧн да батракъяслӧн мед эз вӧв торйӧдчӧма быдӧнысь, мед эз вӧв воддза беднота комитетъяс кодь.
Ӧні гӧль крестьяналы ассьыныс овмӧссӧ дай политика вынсӧ сиктын колӧ ёнмӧдны ас костаныс ӧтувтчӧмӧн дай крепыда тшӧтш шӧркоддьӧма олысь крестьянакӧд ӧтувтчӧмӧн.
Пленум шуис лӧсьӧдны нарошнӧ фонд уджӧн гӧль крестьяналы сеталӧм вылӧ, кокньӧдны государствоӧн удждысьӧмсӧ гӧль крестьяналы, сетны государствосянь отсӧгъяс гӧль крестьяналы кооперацияӧ шленӧ пыригӧн.
Тайӧ уджнас партия шуӧ гӧль крестьяналы: ӧтувтчӧй, ёнмӧдӧй артельӧн ассьыныд овмӧснытӧ, партия быд ногӧн отсалас тіянлы. Сӧмын ӧти туйӧн, тадзи ті верманныд венны кулакӧс кӧзяйство боксяньыд. Кулак вынлы воча сувтӧдны колӧ кӧзяйственнӧй ӧтувтчӧм.
Пленум индіс туй гӧль крестьяналы тшӧтш политическӧй ӧтувтчӧмлы. Сӧмын партия эз висьтав, кутшӧм ногӧн лӧсьӧдны сійӧ ӧтувтчӧмсӧ. Гӧль крестьяналы аслыныс партияса организацияясӧн отсалӧмӧн колӧ корсьны ӧтувтчӧмыслысь ногсӧ. Пленум сӧмын шуис: став сиктса обществоса олӧмас пӧ (сӧветъясӧ, кооперацияӧ, мӧда-мӧдлы отсасян комитетъясӧ бӧрйысигъясӧн) гӧль крестьяналы колӧ овны ӧтсӧгласӧн. Сӧмын пӧ налы оз жӧ ков тайӧ уджас торйӧдчыны шӧркоддьӧма крестьянаысь.
Сідзкӧ, партия шуӧм серти, гӧль крестьяналы колӧ ӧтувтчыны ас костаныс, ӧтувтны ас берданыс тшӧтш шӧркоддьӧма олысь крестьянаӧс да ӧтвылысь мунны налы ставныслы.
О. Попова.
