ЁНДЖЫКА ВИДЗӦДӦЙ КООПЕРАТИВ ВЫЛӦ
Посни кооперативъясын уджыс кутіс мунны омӧля. Лунысь лунӧ кутіс содны кооперативысь эмбур лотайтӧм. Октябр тӧлысьын лыдыс лотайтӧмыслӧн соді. Кырӧдны кутіс олӧмсӧ сиктса кооперативлысь правленньӧясыслӧн да приказчикъясыслӧн лотайтӧмыс кооперативса эмбурсӧ. Пӧшти ӧд ӧти пельӧссянь обласьт пасьтаысь оз во бур висьт кооператив йылысь. Бӧръя здукнас ми кылам Сыктыв уездысь: дас сизим кооператив пытшкысь сӧмын куим кооперативын абу лотайтӧм.
Кооперативса шленъяс падмӧны, некодлы оз вермыны дӧверитны кооперативлысь удж нуӧмсӧ да тӧварсӧ. Тадзи кӧ кутас мунны удж, ми некор огӧ вермылӧй ӧтувтны крестьяна войтырӧс кооперативӧ.
Колӧ вужсяньыс кыпӧдны быд син водзӧ талысь лёксӧ, колӧ вужсяньыс жӧ пуктыны талы пом. Огӧ кӧ пуктӧ талы пом, миян карӧс сикткӧд ӧтувтӧмлы воас ӧдйӧ пом. Оз ков некор некодлы вунӧдны: кооперативыс и эм миян пос карсянь сиктӧ, государственнӧй промышленносьтсянь крестьяна кӧзяйствоӧ да плана кӧзяйствоӧ.
Мед миян висьталӧмыс оз ло весьшӧрӧ, мед быдсӧн думыштасны чорыдджыка да пыдӧджык, аддзасны обществоса лёксӧ, ми индам лыдпасӧн.
Лотайтӧма:
| Уездъяс. | 1923 воын | 1924 воын | 1925 воын (октябр тӧлысьӧдз) |
| Сысола уездын | 3 коопер. — 324 ш. да 78 ур | эз вӧв — | 6 коопер. — 2.426 ш. да 41 ур дон. |
| Кулӧмдін уездын | 2 коопер. — 2.549 ш. да 12 ур | 7 коопер. 4227 ш. да 46 ур дон | 3 коопер. 1860 ш. да 12 ур. |
| Емдін уездын | 4 коопер. 1.941 ш. да 27 ур | 2 коопер. 2.224 ш. да 63 ур | 7 коопер. 3.248 ш. да 88 ур дон |
| Ставыс | 11 „ 4.815 — 17 | 9 „ 6452 — 09 | 16 „ 7535 — 41 |
Бур пыдди, бырӧм пыдди лотайтӧмыс содӧ воысь воӧ водзӧ. 1923 воын вӧлі лотайтӧма 4.815 шайт да 17 ур дон, 1924 воын 6.452 шайт да 9 ур дон, а октябр тӧлысьӧдз 1925 воын 7.535 шайт да 41 ур дон.
Омӧля уджалам. Тадзи кӧ кутас мунны удж водзӧ, миян олӧм оз кыпты, сӧмын ӧтка купечьяс кутасны ӧтортны (венны) миянлысь ӧтувтчӧмсӧ. Колӧ зільджыка да чорыдджыка босьтчыны судъяслы топӧдны обществолысь эмбур лотайтысьясӧс, немтор нюжйӧдлыны делӧяссӧ. Колӧ пӧсь вылас, сэні жӧ местаас, йӧз пытшкын сетны мыж (
Оз ков узьны и шленъяслы да мукӧд войтырлы. Регыд ӧд кывсьывлӧ лотайтӧмъясыд, пырысь-пыр колӧ лотайтысьлы индыны места, кытӧні ракъяс тӧвйӧны.
