«ЫВЛАВЫВ ТӦДМАЛӦМ» НИГА ЙЫЛЫСЬ

Гижис «Кос кабыр». Лэдзӧма Мӧскуаын. Центриздатын, 1925 воын.

Нига гижӧма со кутшӧм ногӧн:

1. Босьтӧма арся удж крестьянинлысь: сю вартӧм, кӧйдыс весалӧм, град выв сорва вӧдитӧм, сідз водзӧ. Гижӧма, кыдзикӧн на гӧгӧр уджалӧны сиктъясын ӧнія кадын да кыдзикӧн колӧ уджавны бур вылӧ.

2. Висьталӧма, мыйла колӧ бура уджалӧм; сыкӧд тшӧтш индӧма ывлавывса петкӧдчӧмъяс (явления природы).

3. Босьтӧма сӧмын ыджыд арся уджъяс; ёнджыка гижӧма сю нянь йылысь.

Судзсьытӧмторъяс нигаын:

1. Эмӧсь бура уна гӧгӧрвотӧмторъяс (видзӧд 7 лист бок, гижӧма: «арын заптыны кӧдзыд, тшыг тӧв кежӧ коланторъяс», а колӧ — «арын — заптыны кӧдзыд тшыг тӧв кежлӧ коланторъяс». 8-ӧд лист бокын гижӧма во кадъяс вежласьӧм йылысь, а сы водзын немтор оз висьтав му чатӧртчӧм понда. Сьӧкыд сійӧ гӧгӧрвоны.)

2. Нигаын юасянъяс дзик абу. Велӧдчысьлы немтор оз ков аслыс мӧвпалыштны, быдӧн ачыс висьтавлӧ гижысьыс.

3. Серпасъяс зэв этша, абу гӧгӧрвоанаӧсь. Колӧ вӧлі быд серпас йылысь ичӧтика висьтыштавны.

Судзсянаторъяс:

1. Гижӧма кокни кывйӧн.

2. Босьталӧма ас, коми, олӧм.

3. Висьталӧма сӧветъяс, кыдзи сю нянь уджавны кокниджыка.

Нига позьӧ лэдзны школаясӧ, нёльӧд вося велӧдчысьяслы; семилеткаясӧ отсӧгтор пыдди. Библиотекаясӧ нигаыс зэв колантор.

Борисов.