ОЗ ЛЭДЗНЫ КРЕСТЬЯНАӦС ПЕТНЫ ХУТОРЪЯСӦ

Проньдорын (Емдін у.) арбыд нин мунӧ видз-му юклӧм. Муяссӧ ставсӧ видлалӧма, сортуйтӧма, 14 крестьяна кӧсйӧны петны хуторъясӧ да ӧтрубӧ. Сӧмын петнысӧ найӧс оз лэдзны мукӧд крестьянаыс. Собранньӧ вылын видлалісны петысьясыслысь заявленньӧяссӧ да зэв ёна увгисны, шуӧны: ті пӧ босьтанныд став бур мусӧ, миянлы пӧ сӧмын лёкыс кольӧ. Прамӧя кӧ эськӧ видзӧдлыны, петысьясыс босьтӧны обществосьыс джын омӧль муяссӧ дай босьтӧны ылыс местаясысь.

Волисполкомлы колӧ прамӧйджыка видзӧдлыны та вылӧ да лэдзны крестьянаӧс петны хуторъясӧ, мед вермисны кыпӧдны ассьыныс кӧзяйствонысӧ. Видз-му закон чукӧр серти, хуторъясӧ петысьясӧс кутны оз вермы.

Зӧтя Илля.