МЫЙӦН ТОРЪЯЛӦ МИЯН МИЛИЦИЯ ВАЖ ПӦЛИЧАЫСЬ
Талун тырӧ кӧкъямыс во сӧветса милиция лӧсьӧдӧмсянь.
Миян пемыд коми войтыр ӧнӧдз на шуӧны: сӧмын пӧ нимыс лои выль — «милиция», сэсся пӧ ставыс коли важ ног — пӧлича. Уналаын на сиктъясын видзӧдӧны весиг милиционер вылӧ важ стражник вылӧ либӧ урадник вылӧ моз: лӧгалӧны, видчӧны, полӧны.
Вайӧ жӧ видзӧдламӧй талун — кутшӧмкӧ разнича эм-абу ӧнія милициялӧн важ пӧличаысь, мыйӧнкӧ торъялӧны оз найӧ.
Зэв ёна торъялӧны.
Важӧн став удж нуӧданінсӧ вӧлі лӧсьӧдӧма сы вылӧ, медым видзны озыръяслысь олӧмсӧ, оласногсӧ, власьтсӧ. Кӧть кутшӧм боксянь эн босьт — ставсӧ вӧлі сы вылӧ лӧсьӧдӧма: армиятӧ, школатӧ, учрежденньӧястӧ, судтӧ — быдтор.
Босьтам пӧличатӧ. Сійӧ ставнас нин вӧлі озыръяслӧн медбур слуга-казакыс. Уджалысь йӧзыд вӧлі дрӧжжитӧ-полӧ пӧличасьыд. Кутшӧмкӧ мыжысь кӧ вӧлі сюран — урадникыд тэ вылӧ сӧтӧн-матьӧн уськӧдчас, став ныр-вомтӧ разяс, воча эн лысьт кыв шуны — садь быртӧдзыд нӧйтас. Сэтшӧмӧсь жӧ и мукӧд пӧличейскӧйяс вӧліны.
Мыйла сідз вӧлі войдӧр? Ставыс важӧн вӧлі вӧчсьӧ лёка, медтыкӧ озыръяслы вӧлі овныс бур да долыд-а. Важ лёк оласногыс лёкмӧдӧ вӧлі и служакъяссӧ-чиновникъясӧс, тшӧтш и пӧличейскӧйястӧ. Найӧ вӧліны зэв пӧслукманӧсь сэкися власьтлы — сарлы да озыръяслы. Юрнаныс и кокнаныс вӧлі сулалӧны на дор. Мый вӧлі тшӧктасны озыръяс вӧчны — найӧ нимкодьпырысь вӧчасны вӧлі, кӧть юрнысӧ жугласны, а вӧчасны.
Со ӧд кутшӧм лёк вӧлі войдӧр олӧмыд. Медгырысь начальствосяньыс медічӧтӧдзыс чорыда вӧлі гыжнас и пиньнас шашаритчӧмаӧсь озыръяс дор, найӧ приказ серти личкыны-пӧдтыны уджалысь йӧзӧс.
Ӧні став лёк оласногыс коли бӧрӧ. Сӧветса милиция — абу важ пӧлича. Милиция, гӧрд армия моз жӧ, видзӧ сӧвет власьтлысь олӧмсӧ, видзӧ пытшсяньыс. Милиция сулалӧ рабочӧйяс да крестьяна дор, видзӧ налысь правасӧ, уджсӧ быдсяма лёкысь. Милиция видзӧдӧ, медым эськӧ гӧгӧр вӧлі вӧчсьӧ сӧвет власьт законъяс серти. Милиция ӧні велӧдчӧ, кыдзи овны да водзӧ нуӧдны олӧмсӧ Ленин индӧм туйӧд.
Милиция вылӧ оз ков видзӧдны кутшӧмкӧ звер вылӧ моз. Быд уджалысь мортлы милиционер ӧні ёрт (тӧварыш). Некутшӧм нӧйтӧм ни ёрччӧм гӧрд милиционерсянь ӧні оз овлы. Повны милицияысь нинӧмла сӧветса гражданинлы. Лӧгавны сы вылӧ оз ков — лӧгалӧны сӧмын лёк йӧз, сӧветса власьтлы лёк вӧчысьяс.
Коми войтыр! Бурджыка видзӧдӧй милиция вылӧ! Отсалӧй сылы быд ногӧн лӧсьӧдны выль сӧветса оласног.
Мед олас Гӧрд, рабочӧя-крестьяна милиция!
Вит.
