8-ӦД ВО РАБОЧӦЙ ДА КРЕСТЬЯНАСА МИЛИЦИЯЛӦН
Талун миян Рабочӧй да Крестьянаса Милиция да Уголовнӧй Розыск празднуйтӧны ассьыныс кӧкъямысӧд во тырӧмсӧ.
Кӧкъямыс во миян милиция дорйис октябрса революцияӧн оланног вежӧмсӧ — помещикъясӧс да капиталистъясӧс вермӧмсӧ. Мыйӧн рабочӧйяс да крестьяна босьтісны ас ки улас капиталистъяслысь власьтсӧ да эмбурсӧ, пырысьтӧм-пыр лои оружйӧӧн заводитчыны дорйыны сійӧс капиталистъясысь.
Сӧвет правительстволы пырысьтӧм-пыр жӧ капиталист ки улысь власьт босьтӧм бӧрти лои босьтчыны организуйтны рабочӧй да крестьяна пытшкысь милиция да уголовнӧй розыск.
Сьӧкыд вӧлі уджавны милициялы да уголовнӧй розысклы. Важ юралысь йӧз — помещикъяс да капиталистъяс — эз вермыны миритчыны налысь эмбур да власьт босьтӧмӧн. Быд боксянь, гусьӧн да явӧ зілисны венны рабочӧйӧс да крестьянинӧс — быд боксянь колӧ вӧлі налы паныд чургӧдны штык.
Сы кындзи пыр лоӧ вӧлі водзсасьны быдпӧлӧс лёк вӧчысь йӧзкӧд. Революция бӧрын быдӧн пырысьтӧм-пыр эз гӧгӧрвоны Сӧвет правительстволысь лад пуктӧмсӧ, а мукӧдыс нарошнӧ эз кӧсйыны гӧгӧрвоны. Эз вӧв этша и сэтшӧм йӧз, кодъяс важ омӧль да гӧль олӧмнас да озыр йӧзӧн нартитчӧмнас чорзисны да кутісны асьныс нартитны гусясьӧмӧн, грабитӧмӧн да мукӧдторйӧн. Мукӧдыс сэтшӧм йӧз пытшсьыс эз вермыны Октябрскӧй Революцияӧн вежсьыны, сідз жӧ нартитчӧны и ӧні.
Быдӧн гӧгӧрвоӧны талысь олӧмсӧ — быдӧнлы жӧ колӧ тӧдны милициялысь да уголовнӧй розысклысь вермасьӧмсӧ татшӧм мыжыскӧд.
Ёна сьӧкыд вӧлі вермасьны кӧкъямыс во чӧжӧн миян милициялы да уголовнӧй розысклы, сьӧкыд вӧлі уджавны тшыгйӧн, кӧмтӧг, быд боксянь смертьысь видзчысьӧмӧн. Сійӧ пӧраыс коли, бандитъяс бырины, революциялы паныд мунысьяс чиніны. Милиция важ дорысь гӧгӧрбок ёнмис.
Милициялы уджысь шогсьыны оз ков, удж эз быр, удж соді. Ӧні колӧ чорыдджыка босьтчыны милициялы велӧдчыны, мед быд милиционер тӧдіс, кодӧс сійӧ дорйӧ, мыйла сійӧ дорйӧ гӧль мортӧс, мыйла колӧ сувтны паныд правительстволысь тӧлк нуӧмсӧ торкысьяслы. Колӧ югдӧдчыны милиционеръяслы аслыныс, сэсся ӧтув быдӧнкӧд заводитны югдӧдны сиктъясысь войтырӧс. Йӧз югдӧдӧмӧн ми регыдджык бырӧдам йӧзлысь мыжъяссӧ, йӧз югдӧдӧмӧн ми регыдджык да чорыдджыка дорамӧй ӧткодя бур олӧмсӧ.
Сиам ми милициялы водзӧ кежлӧ зільджыка да бурджыка велӧдчыны да заводитны велӧдны мукӧд войтырӧс.
