ВИСДІНСА ОБЩЕСТВЕННӦЙ ЛАВКАЛӦН УДЖЫС

Висдінса (Айкатыла вӧл., Емдін у.) общественнӧй лавкаын (ЕПО) уджыс таво тӧдчӧмӧн бурмис. 1924 воын октябр 1-ӧд лун кежлӧ став шленыс вӧлі 47 морт. Таво октябр 1-ӧд лун кежлӧ шленыс 96 нин. На пиын 11 нывбаба. Висдінса общественнӧй лавкаӧ шленъясас пырӧмаӧсь куим сиктысь: Увпомысь, Гӧбановысь да Висдінысь. Куим сиктас лыддьысьӧ 193 керка.

Во чӧжӧн лавкаыс оборотсӧ вӧчӧма 14095 шайт да 97 ур дон. Барышыс воӧма 525 шайт да 57 ур. Ньӧбан тӧвар дон вылас вузавлігас содтӧдыс вӧлӧма 13 прӧчент. Став тӧварыс лавкаас октябр 1-ӧд лун кежлӧ 1331 шайт да 88 ур дон.

Выль правленньӧлы колӧ ёнджыка удж нуӧдны крестьяна пӧвстын, мед эськӧ шленъясас крестьяна пырисныджык.

И. И.