ВАШКАСА МОРТ ШЫӦДЧӦМ ВЫЛӦ (ЮГЫД ТУЙ № 226)

Миян ногӧн кӧ, эськӧ быд челядьӧс колӧ велӧдны 9 во (1-й да 2-й ступеньын), да тадзи вӧчны ӧні оз на позь — став челядьӧс велӧдны абу на 1-й ступень школаясыс тырмидз. Гырысьджык школаяс (сідзжӧ и 2 ст. и семилеткаяс) воссялӧны посни школа лыд серти. Ӧнӧдз гырысьджык школаяссӧ миян восьталӧма вӧлі ылӧсас да посни школа сертиыс вӧлі ёна уна. Ӧти ногӧн кӧ думайтны, дерт, оз ло уна (шуам кӧ, велӧдчыны окотитысь серти), а гӧгӧр кӧ думыштан и — абу ладнӧ.

Гырысьджык школаяссӧ кӧ унджык восьталам, сэки ичӧт школаыс этшаджык лоӧ да сы понда унаӧн кольӧны дзик велӧдчытӧг! Мед татшӧмторйыс эз вӧв, Ставрочмувывса Исп. К-т. да Совнарком таво август тӧлысьын шуисны: гырысьджык школаяс восьтавны посни школа серти, мед 20 посни школаса комплект вылӧ вӧлі 1 гырысьджык школаса комплект (мӧд ногӧн кӧ, 20 класс вылӧ 1 класс). Тадзи кутас мунны водзӧ вылӧ, кытчӧдз оз ло став челядьлы тырмидз посни школа. Сӧмын сы бӧрын кутасны восьтавны гырысьджык школаяс.

В. В. юкӧдын ӧтувтчан уджын п-о заведуйтысь Тимушев.