МЕНАМ ВИДЛӦГ КАРТУПЕЛЬ ВӦДИТӦМЫН

Колян во Абъячойса крестьяна том йӧз школаын велӧдчигӧн унатор висьтавлісны пуктасъяс да му вӧдитӧм йылысь. Тулыснас школаысь гожӧм кежлӧ лэдзалігӧн велӧдысьяс сӧветуйтісны заводитлыны аслыным кӧзяйствоын уджсӧ нуӧдны велӧдӧм сертиыс. Миянкӧд агроном сёрнитіс картупель пуктӧм йылысь да картупель улас мусӧ бурмӧдӧм йылысь. Агроном сэки висьталіс: ёна пӧ картупельлы лӧсялӧ пӧим, да сэсся висьталіс, кыдзи пӧимсӧ колӧ разӧдны му вылас. Ме водзджыксӧ пӧимӧн картупель бурмӧдӧм йылысь эг на кывлы да, меным зэв окота вӧлі сідзсӧ картупельсӧ пуктывны.

Гортын меным бать-мам сетісны картупель улӧ ичӧтик му. Пачьясысь чукӧрті став пӧимсӧ. Картупель пуктігас ме киськалі мусӧ вылісяньыс пӧимӧн. Пукті картупельсӧ вит вершӧк судта, 8 вершӧк мӧда-мӧдысь костӧн. Менам пӧимыд тырмис сӧмын джын муас. Мӧд джынъяс сідз жӧ пукті картупельсӧ, сӧмын пӧимӧн кисьтавтӧг.

Пуктӧм бӧрас регыдик мысти сӧмын пинёвтлі (му вылас чорыд корка олі да, жугӧдлі) да кык вежон мысти мудйылі (копайті).

Картупель босьтігӧн пӧима му вылын менам картупель воис кык мында пӧимтӧм му вылын дорысь.

П. Иевлев.