МӦДА-МӦДЛЫ ОТСАСЯН КОМИТЕТЪЯС БӦРЙИГКЕЖЛӦ

Регыд кутасны выльысь бӧрйыны (перевыборы) мӧда-мӧдлы отсасян комитетъяс (комитеты крестьянской взаимопомощи — КОВ).

Позьӧ шуны, тайӧ комитетъяс вылас миян деревняясын медся на омӧля видзӧдӧны мукӧд общественнӧй организацияяс вылӧ дорысь. Ӧнӧдз на лыддьӧны комитетъяссӧ посньыдик деревняса собесъясӧн, кодъяс отсалӧны толькӧ сирӧтаяслы, пӧрысь йӧзлы, калекаяслы. Эськӧ тайӧ комитетъяслӧн уджыс-могыс паськыдджык дай мӧд пӧлӧс — лӧсьӧдӧны отсӧг нуждаӧ воысь крестьяналы ас обществосянь.

Государство мый вынсьыс зільӧ отсавны гӧль крестьяналы кыпӧдны кӧзяйствосӧ: удждӧ сьӧм, сетӧ быдсяма кокньӧдъяс и мукӧд ногӧн. Сӧмын государстволӧн оз на тырмы выныс (сьӧмыс) быд гӧль уджалысьлы отсавны. Сы понда крестьяналы колӧ аслыныс мӧда-мӧдлы отсасьны.

Татшӧм отсасьӧмсӧ верман бура лӧсьӧдны, кор комитетас пырасны шленӧ став обществосьыс крестьянаыс. Ӧнӧдз шленъясын сэні вӧліны толькӧ медгӧль йӧзыс. Дерт, кор найӧ асьныс нуждайтчӧны, некутшӧм отсӧг сетны оз вермыны.

Комитет кӧть и лыддьыссьӧ став обществоса крестьянскӧй организацияӧн, медвойдӧр могмӧдӧ гӧль крестьянаӧс, сэсся отсалӧ нуждаӧ воӧм шӧркоддьӧм крестьяналы. Сы вӧсна мед найӧ киын жӧ вӧлі и став удж нуӧдӧмыс (руководство). Комитетъястӧ бӧрйигӧн та вылӧ колӧ прамӧя видзӧдлыны.

Важ (ӧнія) комитетъяслы колӧ сетны крестьяналы отчёт, лыддьысьны на водзын, медым став уджыс тыдалӧ вӧлі крестьяналы, медым ӧти кӧпейка абу вӧлі кытчӧсюрӧ видзӧма.

Сэсся кӧнсюрӧ ӧнӧдз на абу некутшӧм шленскӧй взнос. Комитетъяс сьӧм корсьӧм могысь кутчысьӧны йӧз уджӧ, вунӧдӧны ассьыныс уджнысӧ. Та вӧсна шленскӧй взнос колӧ лӧсьӧдны быдлаын. Таво нянь воис бурджыка, оз ло зэв сьӧкыд мынтыны.

Комитетъяслы аслыныс колӧ босьтчыны удж бердас ёнджыка, корсьны местаяс вывсьыс сэтшӧм уджъяс, кытысь позяс босьтны отсасянторсӧ.

Водзӧ вылӧ став уджсӧ комитетъяслы колӧ пуктыны гӧль да шӧркоддьӧм крестьяналы кокньӧд сетӧм вылӧ. Комитетъяс вермасны отсавны гӧль крестьяналы кооперативӧ пырны (на пыдди шленскӧй взнос мынтыны), отсавны удждысьны кӧзяйство кыпӧдӧм вылӧ; колӧ дорйыны гӧль крестьянаӧс быд ног, видзӧдны, мед сетісны налы кокньӧдъяс закон серти, сідз водзӧ.

Мӧда-мӧдлы отсасян комитетса шленъяс пиысь колӧ пыр лӧсьӧдны да ыстыны (выдвигать) выль уджалысьясӧс сӧветъясӧ, кооперативъясӧ. Тайӧ уджсӧ нуӧдны колӧ босьтчыны комитетъяслы аслыныс.

Эр. Квиринг.