ВЕЛӦДЧӦЙ КУТНЫ ОВМӦСТӦ
Воысь воӧ миян овмӧс Сӧвет Союзын бурмӧ да кыптӧ. Воысь воӧ кутіс паськавны и сиктъяслӧн олӧмыс да праваыс.
Водзджык сиктъяс сӧмын вӧлі тӧдӧны вот мынтӧм. Ас киас этша вӧлі сетсьӧ рӧскод вылӧ сьӧм. Дерт, сыысь оз вӧлі позь дивитны сӧвет правительствоӧс, быдсӧн тӧдӧны тӧждысьӧм йылысь Сӧвет правительстволысь крестьяна понда. Колӧ вӧлі мездысьны капиталист государствоясысь, колӧ кыпӧдны ӧтувтчӧмӧн гырысь промышленносьт, мед эськӧ сійӧ вайис государстволы доход да крестьяналы донтӧм тӧвар, а не сӧмын рӧскод, мед эськӧ сэсся вотъяс крестьяналӧн чині.
Ӧні зэв на ёна лоӧ тӧждысьны та понда, но олӧм вежсис нин. Кольӧм восянь заводитчис кыптыны миян кӧзяйство зэв ӧдйӧ. Сійӧ кыптӧмыс ставнас петкӧдчис миян бюджетӧ.
Доход государстволӧн кольӧм восянь содіс 2.858 миллионсянь 3.757 миллионӧдз (дерт, тайӧ сӧмын ещӧ арталӧм). Та бӧрти позьӧ и содтыштны рӧскодъяс быдлаӧ, позьӧ и содтыштны рӧскодъяс вӧлӧсьтъясын, сиктъясын. Рӧскод сиктъясын уна: колӧ туйяс вӧчны, пӧжарнӧй кӧлуй лӧсьӧдны, видз-му уджалӧм бурмӧдны, школаяс кутны, мукӧдтор вӧчны.
Сӧвет Союзса Исполнительнӧй Комитет да Союзнӧй Совнарком август тӧлысьын 14 лунын шуисны паськӧдны вӧлӧсьтувса доходъяс да рӧскодъяс.
Кольӧм воясӧ вӧлӧсьтъяслы сьӧм сетсис этша, дай сійӧс эз сетны ас киас. Таво шуӧма сетны вӧлӧсьтувса бюджетӧ сельхозналогысь ас ки улас 100 миллион шайт, 25% местнӧй доходъясысь, сэсся 50% государствоса доходъясысь вӧръясысь да мукӧдторйысь. Дженьыдджыка кӧ шуны, ӧні сиктъяс асьныс ас выланыс кӧзяинъясыс.
Миян обласьтлӧн таво бюджетыс соді 901.210 шайт, кыптіс 3.125.747 шайтӧдз. Та пытшкысь сетсьӧ вӧлӧсьтувса бюджетӧ нёльӧд юкӧн дорсьыс унджык (28%). Тайӧ, дерт, оз ло сымда, мыйта колӧ сетны закон серти. Но обласьтса Исполнительнӧй Комитет пуктіс пыдди: обласьтса да уездса учрежденньӧсянь бурджык лоӧ уджавны вӧлӧсьтъясын.
Вӧлӧсьтъясын тайӧ выль удж, пырысьтӧм-пыр вӧлӧсьт оз вермы справитчыны тайӧ уджнас. Вӧлӧсьтын эмӧсь школаяс, больнича либӧ пельшӧрскӧй пункт, мукӧдас эм агроном да мукӧдтор. Быд боксянь кӧ босьтам тайӧ уджсӧ да пыдди пуктам, мый тайӧ выльтор, сэки кутас тыдавны — бурджык на таво кежлӧ ӧткымын уджсӧ вӧлӧсьтсьыс кольны обласьт да уезд улӧ.
Ӧні жӧ колӧ заводитны вӧлӧсьтъяслӧн гӧтӧвитчыны да велӧдчыны кутны ас ки улас став вӧлӧсьтса овмӧссӧ.
