ВОЧАКЫВ ЗОНЛЫ

(«Колӧ бӧрйыны бурджык юралысьӧс» гижӧд вылӧ. «Коми Сикт» 26 номерын октябр 10-ӧд лунся).

«Колӧ бӧрйыны бурджык юралысьӧс» гижысь мортыс абу, буракӧ, вӧвлӧма некутшӧм собранньӧяс вылын ни беспартийнӧй конференцияяс вылын.

Пельшӧрӧс кутӧм йылысь беспартийнӧй конференция шуліс: пельшӧрӧс пӧ ас вылысь ми кутны огӧ вермӧй. Карыс пӧ миянсянь матын да, сідзи пӧ ми вермам овны. Электричество лӧсьӧдӧм йылысь быд собранньӧ вылын йӧзыс шуисны: рӧскод пӧ ыджыд да, ми пӧ некыдзи ас тшӧт вылӧ огӧ вермӧй сійӧс лӧсьӧдны.

Моски йылысь беспартийнӧй конференция шуліс: таво пӧ гожӧмын миянлы москисӧ лӧсьӧдны сьӧкыд лоӧ. Мӧд во пӧ вӧр заптам да вӧчам москияссӧ.

Пӧжарнӧй дежурство войдӧрсӧ вӧлі лӧсьӧдӧма, а страда дырйиыс йӧзыс эз сӧгласитчыны дежуритнысӧ.

Скӧтӧн нянь жугӧдӧм йылысь вӧлі вӧчӧма обязательнӧй постановленньӧ. Сійӧ постановленньӧ сертиыс потшӧсъяс потштӧмысь штрапуйтӧма квайт мортӧс.

Тайӧ став йывсьыс вӧлі вӧчӧма доклад вӧлӧсьтувса бӧрйысян съезд вылын. Сійӧ съезд вылас шуисны, волисполком пӧ уджсӧ нуӧдӧма бура.

Выльгортса исполкомын юралысь пыдди вежысьыс Мальцев.

Секретар пыдди Киселев.