АЙКАТЫЛАЫН

(Емдін у.)

Мӧда-мӧдлы отсасян комитет.

Мӧда-мӧдлы отсасян комитет ӧнӧдз пыр на вӧлі сӧмын бумага вылын. Некутшӧм удж сійӧ эз нуӧдлы. Сьӧмыс сылӧн ньӧти эз вӧвлы. Таво вӧлі кӧдзӧма ид да сю 15 пудовня кымын. Уна-ӧ лоӧ сэтысь, оз на тӧдны, вартӧны на. Октябр тӧлысьын вӧліны сиктъясын собранньӧяс мӧда-мӧдлы отсасян комитетъяс йылысь. Собранньӧяс вылын крестьяна быдӧн шуисны пырны шленӧ комитетас. Паевӧй взноссӧ урчитісны 25 ур быд шленлы. Ӧні эськӧ мӧда-мӧдлы отсасян комитетса президиумыслы колӧ заводитны чукӧртны шленскӧй взносъяссӧ, мед бара сідз эз коль шуӧмыс бумага вылас.

Лыддьысян керка

уджалӧ лӧсьыда. Эм сельскокӧзяйственнӧй кружок да селькоръяс кружок. Коммунист партияса ячейка комсомол ячейкакӧд лэдзӧны стенӧ ӧшӧдан газет: «Асъя кыа». Куим тӧлысьӧн лыддьысян керка сетӧма справкаяс 21 крестьянинлы, заявленньӧяс гижӧма сизимдас кымын. Лыддьысян керкаын 190 лыддьысьысь, унджыкыс велӧдчысь. Библиотекаас эм 1200 нига, сӧмын 500 кымыныс важӧсь нин да оз шогмыны.

Лыддьысян керкалӧн эмӧсь и омӧльторъяс. Избачыс нуӧ кӧкъямыс должносьт да ёнасӧ лыддьысян керкаас оз вермы уджавнысӧ. Сэсся лыддьысян керкаыс исполкомын да сійӧ абу жӧ лӧсьыд.

С. В.

Редакциясянь. Ми корам гижны унджык селькор кружок йывсьыс: кымын морт сэні, кыдзи да мый уджалӧ.