ВЕРДӦЙ СКӦТНЫТӦ ВЫНА КӦРЫМӦН ДА ВЕСӦН
Колян тӧв Абъячойса (Сыктыв уездын) сельскокӧзяйственнӧй кружокын мӧс вердӧм йылысь шулісны: колӧ пӧ видлыны, вайӧ оз кутшӧмкӧ пӧльза кымынкӧ пӧлӧс кӧрымӧн (жмыкъясӧн) да весӧн мӧскӧс вердӧм.
Корсисны сьӧм жмык ньӧбны. Ӧти морт кружокысь кӧсйысис ассьыс кык мӧскӧс вердны. Вердіс ӧти тӧлысь. Быд лун гижалісны, мыйта содӧ йӧлыс да мыйта кӧрым вердӧма быд мӧскыслы.
Тӧлысь мысти арталісны да аддзисны: первойя мӧскыс весӧн да жмыкӧн вердтӧдзыс лысьтӧ вӧлі 2½ пунт йӧвсӧ, бӧрыннас кутіс лысьтыны 10 пунт; мӧд мӧскыс жмыкӧн вердтӧдз лысьтӧ вӧлі йӧвсӧ 3 пунт, бӧрвылас кутіс лысьтыны 11 пунт.
Весӧн да вына кӧрымӧн (жмыкӧн) вердігӧн мӧсъяслӧн йӧлыс соді нёль мындаӧн унджык.
Ӧні босьтам кӧрымыслысь да йӧлыслысь донсӧ (Абъячой вӧлӧсьтса дон серти) да арталам — эм абу кутшӧмкӧ выгӧда скӧтӧс вына кӧрымӧн вердӧмысь: 1 пуд шӧркоддьӧма турун сулалӧ — 20 ур, 1 пуд вося идзас — 10 ур, 1 пуд жмык — 70 ур, 1 пуд йӧв сувтӧ — 60 ур (вый вылӧ вӧчӧмӧн кӧ, арталӧма ӧти ведра йӧлысь ӧти пунт вый. Пунт выйыс сулалӧ 45 ур. Пуд йӧлысь выйыс артмӧ 1⅓ пунт).
Ӧні видзӧдлам, мый дон сёйӧны мӧсъясыс вына кӧрымӧн вердтӧдз да вердӧм бӧртиыс, мый дон сетӧны йӧвсӧ.
Мый дон вердӧма кӧрымсӧ.
| Весӧн вердтӧдз быд мӧс вылӧ воис. | Весӧн вердігӧн. | ||
| I мӧс | ІІ мӧс | ||
| 15 пунт турун — 7½ ур. | Турун | 10 пунт — 5 ур | 9 пунт — 4½ ур |
| 10 „ идзас — 2½ ур. | Идзас | 8 „ — 2 ур | 8 „ — 2 ур |
| Жмык | 4 „ — 7 ур | 3¼ „ — 6 ур | |
| Ставыс 10 ур. | 14 ур. | 12½ ур. | |
Йӧвсӧ лысьтісны:
| Весӧн вердтӧдзыс | Весӧн вердігӧн | |||
| Кымын пунт | Мый дон | Кымын пунт | Мый дон | |
| I мӧс | 2½ п. | 3¾ ур | 10 п. | 15 ур. |
| ІІ мӧс | 3 п. | 4½ ур | 11 п. | 16½ ур. |
Та серти ми аддзам: первойя мӧскыс куш турунӧн да идзасӧн вердігӧн сёйӧ 10 ур дон, лысьтӧ йӧвсӧ 3¾ ур дон — вайӧ убытка 6 урӧн лун. Нормаӧн да жмыкӧн вердігӧн сетіс барыш 1 урӧн лун (тані ми мӧскӧн куйӧд сетӧмсӧ огӧ лыддьӧй). Сідзи жӧ мӧд мӧскыс жмыкӧн вердӧмӧн кутіс сетны 4 ур барышсӧ быд лун.
Водзӧ кӧ эськӧ мӧсъяссӧ жмыкӧн лои вердӧма, налӧн йӧлыс ещӧ на соді. Сӧмын кружоклы бӧр лои эновтчыны таысь, жмыкыс вылӧ сьӧмыс эз ло да.
Со кутшӧм сетӧны мӧсъясыд вына кӧрымӧн да нормаӧн (весӧн) вердігӧн.
Кружокын удж нуӧдысь.
