МЫЙЛА ЛОКТӦНЫ МИЯНӦ МУКӦД ГОСУДАРСТВОЫСЬ РАБОЧӦЙЯС ДА МЫЙ ВЫЛӦ НАЙӦ МЕДЪЁНАСӦ ШЕНЗЬӦНЫ

СССР-ӧ зэв уна государствоясысь нин волісны дай локтӧны на рабочӧйяслӧн делегацияяс. Капиталистъяс СССР-ӧ волысь рабочӧйясӧс вӧтлалӧны пабрик-заводъяс вывсьыс, быд ногӧн кедзовтӧны. Сӧмын рабочӧйяс СССР-ӧ волӧмысь, СССР-кӧд тӧдмасьӧмысь эз дугдыны.

Мукӧд государствоса рабочӧйяс кӧсйӧны ас синнас видзӧдлыны, кыдзи олӧ да кыдзи вӧчсьӧ медводдза ставмувывса рабочӧйяслӧн да крестьяналӧн Республика.

Капиталист государствоясын унджык рабочӧйясыс на мунӧны меньшевикъяс велӧдӧм серти. Меньшевикъясыс велӧдӧны рабочӧйясӧс ӧтвылысь, бура овны капиталистъяскӧд, кывзыны налысь, терпитны найӧс. Меньшевикъяслӧн нырщикъясыс капиталистъяскӧд ӧтвылысь ылӧдлӧны: вывті пӧ сьӧкыд овны СССР-ын — рабочӧйясыс пӧ ыджыдалӧны сэні да.

Сы вӧсна мукӧд государствоса рабочӧй делегацияяс СССР-ӧ локтӧм бӧрын медвойдӧр зільӧны тӧдмасьны, кыдзи миян лӧсьӧдӧма государствосӧ, кутшӧма да унаӧн-ӧ уджалӧны рабочӧйяс да крестьяна сӧветскӧй удж нуӧданінъясас, кыдзи СССР-са йӧзыс видзӧдӧны Сӧвет власьт вылӧ.

Став волысь делегацияясыс зэв бура тӧдмалісны миян каръясын да сиктъясын Сӧветъяслысь уджсӧ, налысь оласногсӧ. Ми найӧс некутшӧма куттӧг лэдзавлім дай лэдзалам видлавны быд учрежденньӧяс. Став делегацияясыс шуӧны: СССР-ын пӧ медличыд овны уджалысь йӧзлы. Делегацияяс пытшкас эськӧ эмӧсь быдпӧлӧс партияысь шленъяс да, тайӧ шуӧмъясыс найӧ ставыс ӧти кывйӧ воӧны.

Мукӧд государствоса делегатъяслы сэсся зэв ёна сьӧлӧм вылас воӧ помещикъяслысь революция бӧрын муяс босьтӧм да крестьяналы сетӧм. Дивуйтчӧны, мый пабрик-заводъяс ставыс миян сӧветъяс киын, мый рабочӧйяс уджалӧны сӧмын 8 час луннас, ставсӧ страхуйтӧмаӧсь найӧс да мукӧдтор вылӧ.

Ёна жӧ сьӧлӧм вылас воӧ мукӧд государствоса делегациялы правительствоӧн курортъяс, шойччан керкаяс да санаторияяс рабочӧйяслы да крестьяналы лӧсьӧдӧм.

Дерт, делегатъяс индӧны жӧ миян омӧльторъяс вылӧ: омӧль машинаяс вылӧ пабрик-заводъяс вылын, каръясын йӧзлы оланін тырмытӧм вылӧ. Сӧмын найӧ аддзӧны дай индӧны: тіян пӧ промышленносьтыд пыр кыптӧ, рабочӧйяс пӧ да крестьяна СССР-ын ёна нин вежӧраӧсь.

Гортас локтӧм бӧрын мукӧд государствоса делегатъяс висьтавлӧны асланыс рабочӧйяслы збыльсӧ СССР йылысь, зільӧны веськӧдны капиталистъяслысь пӧрйӧдлӧмсӧ. Делегатъяс висьтавлӧм бӧрын мукӧд государствоса рабочӧйяс да крестьяна бура нин кутісны видзӧдны СССР вылӧ, ёна нин на пиын кутіс содны миян дор сулалысь йӧз. Мукӧд государствоса рабочӧйяс заводитӧны нин эскыны, мый СССР-са крестьяна да рабочӧйяс заводитӧм уджсӧ эз эновтны, пыр ӧтарӧ, чорыда мунӧны водзӧ коммунизмлань.

Ахманов.