50 АРӦС ТЫРӦМ КАЛИНИНЛӦН

Ноябр тӧлысьын 19 лунӧ тыри миян «Ставсоюзса старӧсталы» Микаил Иванӧвич Калининлы ветымын арӧс.

Ветымын во сайын чужи крестьянин семья пытшкын миян Калинин. Сы бӧрти уна киссис пӧсь да вир крестьяналӧн да рабочӧйлӧн важ омӧль олӧмыскӧд вензигӧн. Ёна лои сьӧкыда овны, вензиг дырйи важ оласногыскӧд Калининлы. Сьӧкыд да гӧль олӧмыс крестьянинлӧн вӧтліс Калининӧс пабрикаӧ да заводӧ. Сійӧ жӧ сьӧкыд олӧмыс пабрикаас да заводас тшӧктіс Калининӧс сувтны воча капиталистъяслы да помещикъяслы.

Дас квайт арӧс тырӧм бӧрти Калинин заводитчис аддзыны сарлысь, помещиклысь да капиталистлысь лёксӧ. Сувтіс налы воча. Ӧтувтчис мукӧд оласног лӧсьӧдысьяскӧд: рабочӧйкӧд да крестьянинкӧд.

1898 воын Калинин пырис рабочӧй партияӧ. Татысянь и заводитчис Калининлӧн изсьӧмыс сар изки улын. Заводитчисны помасьтӧм арестъяс, ссылкаяс да тюрмаяс.

Калининӧс тайӧ эз повзьӧд, сӧмын чорыдджыка босьтчӧ дорйыны правасӧ рабочӧйлысь да крестьяналысь.

Эз ӧтиысь ну Калинин крестьянинӧс да рабочӧйӧс капиталистъяслы паныд, эз ӧтиысь индав рабочӧйлы да крестьянинлы, кытісянь воӧ налы омӧльыс.

Эз помась удж Калининлӧн и ӧні, Сӧвет Союз пуксьӧм бӧрти. Быд пельӧссянь крестьянин тӧдӧ Калининӧс, быд крестьянинлы нимкодь кывзыны велӧдӧмсӧ Калининлысь. Калинин крестьяналы — тӧварыш, велӧдысь, вождь.

Февраль тӧлыссянь 1919 восянь Калининӧс бӧрйисны председательӧ РСФСР-са Центральнӧй Исполнительнӧй Комитетӧ, а сэсся Сӧветскӧй Социалистическӧй Союз лӧсьӧдӧм бӧрти бӧрйисны председательӧ СССР-са Центральнӧй Исполнительнӧй Комитетӧ. Сэсянь вежсьывтӧг Калинин юраліс да велӧдіс, кыдзи колӧ радейтны ӧтувтчӧмӧн олӧмсӧ крестьяналысь рабочӧйяскӧд.

Кутам жӧ ми сины миян «Ставсоюзса старӧсталы» кузь нэм да бур лад пуктӧмӧн водзӧ велӧдӧм.