БӦРЪЯ ВИСЬТ КИТАЙ ЙЫЛЫСЬ

Воддза «Коми Сиктын» ми гижлім Китайса гражданскӧй война йылысь. Ми сэні пасйылім Фэн Юйсянӧн воча Чжан Цзолиньлы мунӧм йылысь. Ӧні ми кылам: Чжан Цзолинь пӧ кӧсйӧ миритчыны да бӧр мунны Мукденас. Та серти позьӧ шуны: Чжан Цзолиньӧс кутісны венны, китайса йӧз Фэн Юйсян юралӧмӧн кутіс збыльысь босьтчыны вӧчны олӧмсӧ ас ногыс.

Мукӧд государствоса газетъяс серти, Кантонса революционнӧй правительство вӧтліс Гуандун провинцияысь Чэнь Цзюнминӧс (Чжан Цзолиньдорса генералӧс) дай вӧтӧдӧ на водзӧ.

Неважӧн на Чжан Цзолин да Чэнь Цзюнмин вӧлі виалӧны китайса рабочӧйясӧс Шанхайысь, Тяньцзиньысь да мукӧдлаысь, неважӧн на вӧлі найӧ штыкӧн да пуляӧн тшӧктӧны уджавны китайса рабочӧйясӧс японскӧй да английскӧй пабрикаын да заводын, неважӧн на и артасисны найӧ Кантон вылӧ. Тӧлыс бергӧдчис мӧдарӧ — ӧні кутісны асьнысӧ венны. Кутіс кыптыны ёнджык сёрни и таможеннӧй конференция вылын (та йылысь муніс сёрни воддза «Коми сиктъясын») Китайса делегатъяслӧн мукӧд государствоса представительяскӧд. Китайса делегатъяс шуӧны: «Китай ӧні оз кор лэптыны таможеннӧй тарифсӧ, а тшӧктӧ сетны бӧр ассьыс став правасӧ, не сюйсьыны мукӧд государстволы сійӧ олӧмас».

Найӧ шуӧны: «Онӧ кӧ сетӧй миянлы бӧр правасӧ ас ног вӧчны таможеннӧй тарифсӧ, ми тупкам сёрнисӧ конференция вылын да босьтчам мукӧд ног бергӧдны ассьыным правасӧ». Татшӧм сёрни Китайса правительство сӧмын первой на висьталӧ капиталист государствояслы.

Збойлун Китайса правительстволӧн лунысь лунӧ кыптӧ, лунысь лунӧ капиталист государствояслы паныд сувтӧны чорыдджыка.