МӦДА-МӦДЛЫ ОТСАСЬӦМ — СТАВ КРЕСТЬЯНАЛӦН УДЖЫС
Мӧда-мӧдлы отсасян обществоясса Центральнӧй Комитетса пленум вылын шуӧмъяс
Мӧда-мӧдлы отсасян комитетъясӧ уджалысьяссӧ колӧ бӧрйыны ёна видзӧдӧмӧн, мед сэтчӧ оз вермыны пырны ковтӧм йӧз. Сэсся колӧ зільны мӧда-мӧдлы отсасян комитетъясӧ кыскыны став крестьянасӧ.
Пленум шуис лэптыны уджсӧ ревизионнӧй комиссияяслысь. Найӧ ӧнӧдз вӧліны сӧмын бумага вылын, уджсӧ некутшӧмӧс эз нуӧдлыны.
Водзӧ кежлӧ шуисны мӧда-мӧдлы отсасян комитетъясӧ бӧрйысьны торйӧн сӧветъясӧ бӧрйысьӧмысь.
Мӧда-мӧдлы отсасян комитетъясӧ шленӧ пырӧмыс лоӧ ас вӧляӧн, чукӧрӧн (
Мӧда-мӧдлы отсасян комитетъяслы ассьыныс уджсӧ колӧ нуӧдны ӧтвылысь кооперативъяскӧд да Рабземлес Союзкӧд. Кооперативъясӧ бӧрйысигӧн мӧда-мӧдлы отсасян комитетъяслы оз ков сулавны бокын. Водзвылас колӧ вӧчавны собранньӧяс да собранньӧяс вылас ёна сёрнитны бӧрйысьӧм йылысь, бӧрйыны ассьыныс кандидатъясӧс кооперативъясас да зільны найӧс пыртны кооперативса правленньӧясас.
Сэсся пленум ёна сёрнитіс мӧда-мӧдлы отсасян комитетъясӧ унджык сьӧм чукӧртӧм йылысь. Шуисны пырысьтӧм-пыр жӧ чукӧртны шленскӧй взносъяс общество шленъяслысь. Чукӧртігас колӧ ёна видзӧдны быд шлен овмӧс вылӧ да босьтавны взноссӧ овмӧс сертиыс. Комитетас уджалысь йӧзыслы уджалӧмсьыс мынтысьӧм вылӧ да организационнӧй рӧскодъяс вылӧ оз ков видзны 10−15 прӧчентысь унджык став комитетса сьӧмсьыс. Колӧ дзикӧдз чинтавны ковтӧм рӧскодъяс комитетса предприяттьӧяс вылӧ. Мӧда-мӧдлы отсасян комитетъяслӧн колӧ вӧчавны сэтшӧм предприяттьӧяс, медым сійӧ некутшӧм убытка эз вай. Сэсся комитетъяслы ёнджыка колӧ видзӧдлыны кӧзяеватӧм овмӧсъяс вылӧ, мед эськӧ сэтшӧм овмӧсъясыс бокӧ эз мунны.
Гӧль крестьяналы отсавны медъёнасӧ видз-му кыпӧдӧм кузя.
Мӧда-мӧдлы отсасян комитетъяслы медъёнасӧ колӧ отсавны гӧль крестьяналы му-видз кыпӧдны. Комитет шленъяслы отсалӧм вылӧ сьӧмсӧ сетӧ быдӧнлы уджӧн. Сӧмын кодлӧн нин зэв ыджыд урон лоӧма — керкаыс сотчӧма, шерӧн став няньсӧ жугӧдӧма да сідз водзӧ — позьӧ сетны сьӧмсӧ дзикӧдз, бӧр кортӧг. Школаын велӧдчысь бать-мамтӧм либӧ зэв гӧль крестьяна челядьлы мӧда-мӧдлы отсасян комитетлы колӧ ньӧбны кӧмкот-паськӧм, нигаяс да мукӧд коланторъяс.
Мӧда-мӧдлы отсасян комитетлы колӧ тшӧтш уджавны быд сельскокӧзяйственнӧй налогӧвӧй да земельнӧй комиссияын. Медъёнасӧ нин тшӧтш колӧ уджавны вӧр да пес юклан комиссияясын.
Зэв ыджыд удж мӧда-мӧдлы отсасян комитетъяслы ӧні — отсавны лӧсьӧдны кӧйдыс запасъяс. Комитетъяслы колӧ отсавны лӧсьӧдны запассӧ, кодлы колӧ юклыны, да бура видзны. Сэсся комитетъяслы аслыныс колӧ лӧсьӧдавны кӧйдыс запасъяссӧ. Кӧйдыс запас лӧсьӧдӧм вылӧ позьӧ мыйкӧ мында торйӧдны комитетса общӧй фондысь. Няньтӧм воясӧ либӧ кутшӧмкӧ причча суӧм бӧрын кӧйдыс запасъяссьыс комитетыс вермас отсавны аслас шленъяслы кӧйдысӧн дай сёян вылӧ нянь сетӧмӧн.
Со мыйяс шуис да кӧсйӧ нуӧдны олӧмас ӧнісянь жӧ крестьяналӧн мӧда-мӧдлы отсасян обществоса Центральнӧй Комитетыслӧн пленумыс.
