ВИДЗӦЙ ПОРСЬЯС

Порсь видзӧм овмӧсӧ вермӧ сетны зэв уна буртор, ёна вермас вердны яйӧн. Миян Коми муын порсьястӧ позьӧ видзны уна, шедӧ уна сійӧс верданторйыд — картупель. Бӧръя воясӧ порсь видзӧм миян кутіс ёна паськавны. Быд сиктын нин эмӧсь порсь видзысьясыд. Сӧмын омӧля порсь видзӧмыд этша вермӧ сетны дядьӧыдлы бурторсӧ, унджык вайӧ бур дорысь лёк. Кутшӧм нӧ миян порсь видзӧмлӧн лёкъясыс?

Ӧти-кӧ, порсь рӧдыс ичӧт, мӧд-кӧ — огӧ кужӧ порсьсӧ видзны, вердны.

Кутшӧм порсь колӧ видзны да кыдзи бӧрйыны.

Бур порсьяс миян муын эмӧсь. Сійӧс вайлӧмаӧсь Англияысь, шусьӧ «йоркширскӧй пӧрӧда». Татшӧм порсьсӧ позьӧ тӧдны со мый серти: ичӧт юра, нырыс чукля, пельыс сулалӧ, сьыліыс дженьыд, тушаыс кузь. Татшӧм порсьыд ар 1½−2 кымын сетӧ 14−15 пуд, мукӧддырйиыс 20−22 пуд яй. Сэсся пиянсӧ сетӧны 10−15-ӧдз.

Кысь босьтны бур порсьӧс.

Бур порсь позьӧ босьтны уна местаысь; Эжва кывтыдын: Айкатылаысь, Пальысь, Проньдорысь. Тайӧ сиктъясын эмӧсь порсь видзан артельяс. Сэтысь жӧ позьӧ босьтны рӧд нуӧдӧм вылӧ ыджыд ай либӧ энь порсь. Порсь колӧ босьтны оз ӧти семьяысь, а разнӧйысь. Ӧти семьяса порсь лёкмӧ рӧд нуӧдігӧн. Ай порсь колӧ босьтны бурӧс, ёнӧс. Тӧлысь 8−9 бӧрын позьӧ энь порсьяс дінӧ лэдзлыны, сӧмын оз ков ӧти лунӧ уна энь порсь дінӧ лэдзны, сэки ай порсьыд омӧльтчас. Энь порсь колӧ бӧрйыны ёнӧс, крепыдӧс, мед вӧлі уна нёня; тырсьӧдны сійӧс позьӧ 9−10 тӧлысь мысти, таысь водз оз ков. Видзны позьӧ во 6 кымын.

Кыдзи колӧ видзны пияна дырйи.

Порсьӧс тыра дырйиыс позьӧ видзны ӧтлаын мукӧд порсьяскӧд. Сӧмын вежон кык пиянасьтӧдзыс колӧ янсӧдны. Пиянасигӧн колӧ видзны шоныдінын. Кӧдзыдінын порсьпиян вермасны кынмыны. Колӧ сӧстӧм воздух.

Кыдзи колӧ вердны.

Эм кык пӧлӧс сёянтор: 1 порсьяслысь тушасӧ быдтігӧн, яй да гос содтігӧн. Первой ногнас колӧ порсьясӧс вердны быдмигас, мӧд ногнас — кор порсьӧс кӧсъян регыд начкыны да мед унджык лоӧ яй да гос. Первой ногса сёянторъясыс со кутшӧм: кыд, турун, идзас, мӧд ногсаыс — картупель, ид пызь. Дерт, позьӧ ӧтинас и мӧднас вердны, сӧмын сэки оз ло бур порсь. Порсь вердӧм кузя ещӧ колӧ тӧдны со мый: 1) ӧти кадӧ сетны сёянтор, 2) вердны колӧ порсь серти, том порсьясӧс 4−5 пӧв, гырысь порсьясӧс куимысь, 3) выль вердас вылӧ колӧ вуджны ньӧжйӧник велӧдӧмӧн, 4) колӧ сёянтор вежлавны, 5) весавны сёян сеталан доз быд сёйӧм бӧрти.

Кутшӧм оланін колӧ порсьлы.

Шуӧны: порсь пӧ порсь и эм, сылы пӧ сӧмын няйтын туплясьны да лёк местаын овны. Вӧлӧмкӧ, абу сідзи. Порсьлы колӧ бур гид. Мед пыр вӧлі сӧстӧм воздух, югыд, гидыд эз вӧв няйт, мед сэсся вӧлі шоныд.

Сандрӧ Васьӧ.