КОММУНИСТ ПАРТИЯ ГӦЛЬ КРЕСТЬЯНАЛЫ ОТСАЛӦ
Коммунист партияса Центральнӧй Комитет бӧръя пленум вылас^Вӧлі таво октябрын./^ (заседанньӧ вылас) зэв унатор вӧчис гӧль крестьяналы отсалӧм кузя.
Гӧль крестьяналы колӧ, мед сӧветъясӧ веськаліны эськӧ найӧс дорйысь йӧз — гӧль крестьяна жӧ. Мед эськӧ Сӧветас эз веськавны кулакъяс. Пленум шуис: колӧ пӧ зільны кыскыны сӧвет уджӧ став гӧль да шӧркоддьӧма олысь крестьянаӧс.
Мед гӧль крестьянаӧс кыдзкӧ кулакъяс эз вермыны ылӧдны, мед эз вештыны найӧс Сӧветъясас уджалӧмсьыс, пленумыс аслас резолюцияын шуӧ: «Сӧветъясӧ бӧрйысигӧн дай водзӧ сӧветъясас уджалігӧн (тшӧтш кооперативъясын, мӧда-мӧдлы отсасян комитетъясын) гӧль крестьянаыслы колӧ вӧчавлыны торъя собранньӧяс. Сэсся заводитны ӧтувтчыны сиктъясын да вӧлӧсьтъясын гӧль крестьяна чукӧръяс (сэтчӧ жӧ пыртны став батракъяссӧ). Зільны шӧркоддьӧма олысь крестьянакӧд ӧтвылысь сӧветъясӧ да кооперативъясӧ бӧрйӧм йӧзлы тшӧктыны вӧчны налы коланторъяссӧ. Ӧтвылысь жӧ шӧркоддьӧма олысь крестьянакӧд бӧрйыны йӧзӧс сӧветъясас да кооперативъясас».
Тайӧ кывъяссьыс позьӧ нин гӧгӧрвоны: коммунист партия зільӧ отсавны гӧль крестьяналы ӧтувтчыны да сӧветъяссӧ ас кианыс босьтны.
А мед сійӧс вермасны вӧчныс, колӧ ӧтувтчыны бӧрйысигӧн шӧркоддьӧма олысь крестьянакӧд.
Ӧтувтчӧмӧн да сиктса коммунист партияса ячейкаӧн отсалӧмӧн позьӧ пыр бӧрйыны сэтшӧм сӧвет, коді кутас уджавны на дор.
Сідзи жӧ и кооперативъясын.
Кооперативъяслы колӧ отсавны гӧль крестьяна кӧзяйствояслы. Та йылысь коммунист партияса Центральнӧй комитетлӧн пленумыс шуис ёнджыка зільны кыскыны гӧль крестьянаӧс кооперативӧ; кокньӧдны налы пырны шленъясӧ сельскокӧзяйственнӧй да удждысян кооперацияӧ; ёнджыка сетавны сьӧм уджӧн гӧль крестьяналы видз-мунысӧ кыпӧдӧм вылӧ.
Сэсся пленум шуис лӧсьӧдны торъя фонд Центрса сельскокӧзяйственнӧй банкын гӧль крестьяна кӧзяйствояслы отсалӧм вылӧ.
Ещӧ пленум шуис: кыдз-мый вермам пӧ колӧ отсавны лӧсьӧдавны сельскокӧзяйственнӧй коммунаяс да тӧвариществояс, кыскыны сэтчӧ гӧль да шӧркоддьӧма олысь крестьянаӧс, отсавны налы судзӧдавны видз-му уджалан машинаяс.
Медъёнасӧ колӧ лэптыны крестьяна пӧвстын мӧда-мӧдныслы отсасьӧм комитетъяс пыр. Сійӧ вермас ёна отсавны гӧль крестьяналы кыпӧдны кӧзяйствосӧ да кокньӧдны пырны кооперацияӧ.
Сӧвет власьт лэдзис нин зэв уна закон гӧль крестьянаӧс дорйӧм кузя.
Сӧмын сиктъясын сійӧ законъяссӧ оз на ставсӧ олӧмнас нуӧдны. Сы вӧсна пленум шуис: коммунист партияса организацияяслы колӧ видзӧдны, мед гӧль крестьяналы сеталісны став кокньӧдъяссӧ законъяс серти налогъяс пукталігӧн, видз-му лӧсьӧдігӧн, вӧр сетігӧн да мукӧд дырйи.
Тайӧ висьталӧмыс — медтӧдчанаторъясыс пленум шуӧмъясын гӧль крестьяналы отсалӧм кузя. Сиктса коммунист партия ячейкаяслы колӧ та йылысь висьтавлыны ёна крестьяналы дай удж вылас гӧль крестьяналы отсавны кыпӧдны овмӧссӧ да ӧтувтчыны.
Г. Рыклин.
