2-ӧд КРЕСТЬЯНСКӦЙ ЗАЁМ КЫПӦДӦ ОЛӦМТӦ

Уна крестьяна вӧлі ошкӧны нянь заём да первоя воана Крестьянскӧй заём. Сійӧ пӧ ёна кокньӧдіс мынтыны вотъяс, дай уна крестьяна вермисны воны сьӧм.

1-ӧд ноябрсянь Сӧвет правительство лэдзис 2-ӧд воана Крестьянскӧй заём 100 миллион дон, кык во кежлӧ.

Доныс облигацияыслӧн сулалӧ 5, 10 да 50 шайт. Кыдзи и войдӧрся крестьянскӧй заёмъяс, ӧнія облигацияяс босьтӧны вот мынтігӧн. Сы кындзи, доходыс заёмсьыс воддза серти ыджыдджык: быд тӧлысьын быд шайтысь позьӧ купонъяс вылӧ босьтны ӧти ур; босьтан кӧ облигациясӧ 100 шайт дон, сэки кутан во гӧгӧрӧн босьтны прӧчент 12 шайт; первоя Крестьянскӧй заёмыд сетӧ вӧлі сӧмын во гӧгӧрын 100 шайт вылӧ 5 шайт. Сэсся первойя заёмсӧ лэдзисны тулыснас да гожӧмнас, кор лишка сьӧмъяс крестьяналӧн абу. Ӧні мунӧ инӧдӧм 2 крестьянскӧй заёмсӧ арсяньыс дай кутас мунны во чӧж. Таысь ӧтар, воанторйыс (розыгрышыс) зэв ёна соді. Кольӧм розыгрышыс вӧлі 25 шайтсянь 1000 шайтӧдз, ӧні лои 25 шайтсянь 5000 шайтӧдз. Быд морт, коді кутӧ киас облигациясӧ, вермас воны уна сьӧм. Кык во чӧжӧн розыгрышыс лоӧ кӧкъямысысь.

Ӧні крестьянаяс олӧмӧн кыптӧны, уна йӧз вермасны чӧжыштны водзӧ кежлӧ сьӧм Крестьянскӧй заём ньӧбӧмӧн.

Сӧвет правительство сійӧ сьӧмнас ёнджыка вермас кыпӧдны олӧмсӧ, а капиталистъяс аддзасны миянлысь кыптӧмсӧ найӧ заёмтӧг. Сэки кутасны гӧгӧрвоны найӧ весьшӧрӧ миянӧс йӧртӧмысь, кутасны миянлы ёнджыка сетны кредитъяс (уджӧн вузавны миянлы машинаяс да мукӧд тӧваръяс), дай заём йылысь бурджыка думыштасны.

Крестьяна, аслыныд бур, сӧвет государстволы бур, босьтӧ Крестьянскӧй заём. Ӧні мунӧ Госбанкын подписка; сӧмын колӧ 10-ӧд юкӧнсӧ облигация доныслысь гижсигад мынтыны.