ЭНӦ ТЫРТӦЙ ПОСНЬЫДИК ЮЯС ЛӦПЪЯСӦН

Коми обласьтын посньыдик юяс кузя ёна кылӧдны лоӧ вӧр. Сэсся крестьяна сэті кылӧдӧны пуяс вылын турун, дай пыжъясӧн налы ёна жӧ колӧ ветлыны. Сы вӧсна колӧ, мед эськӧ посньыдик юяс пыр вӧліны лӧптӧмӧсь, мед юяс кузя пыр позис лӧсьыда ветлыны. Миян унджык юясыс, медсясӧ нин кыті вӧр кылӧдӧны, тырӧмаӧсь быдсяма пӧлӧс лӧптӧн: пу йывъясӧн, лапъясӧн, быдса пуясӧн. Унджык лӧпсӧ шыблалӧны юяс боксӧ весалігӧн. Юяс весалӧмыд вӧр кӧзяйство нуӧдігӧн медводдза удж. Сӧмын вӧр юкӧдлӧн (лесной отдел обземуправления) этша сьӧмыс да, оз на вермы нуӧдны гырысьджык уджъяссӧ юяс весалӧм кузя. Обласьтувса видз-му юкӧд (обземуправление) тӧдмалӧм серти тыдалӧ, мый юяс ёна зэв ёгӧсьтлӧмаӧсь, тырталӧмаӧсь революция бӧрти первой воясас. Сэки вӧр удж нуӧдӧм вӧлі ставыс торксьӧма, вӧр вылӧ вӧлі видзӧдӧны омӧля. Вӧр лэдзысь фирмаяс сэки асьныс оз вӧлі зільны юяссӧ ёгӧсьтӧмсьыс кутнысӧ. Сійӧ ёгыс ӧні пыр кутчысьӧ юясас.

Ӧні став СССР пасьта кӧзяйство кутіс кыптыны. Сідзжӧ кыптӧ вӧр удж нуӧдӧм. Вӧр лэдзысь фирмаяс ӧні дугдісны юясӧс ёгӧн тыртӧмысь. Сӧмын на кындзи юястӧ ёна на ещӧ ёгӧсьтӧны асьныс крестьянаыс. Юяс бердысь вӧр весалігӧн став лӧпсӧ шыблалӧны юясас. Сэсся крестьяна некор оз бӧр босьтавлыны чери кыян воджъяс. Кералӧм пуяссӧ, мыръяссӧ да лӧпъяссӧ чукӧртӧм пыдди да сотӧм пыдди крестьяна ставсӧ шыблалӧны юясӧ. Найӧ сэки оз и мӧвпыштны, мыйта вайӧны омӧльсӧ аслыныс, аслас сиктса йӧзлы дай государстволы. Ёгтӧм юяс кузяыд ӧд кокньыдджык вӧр кылӧдны дай турун кокньыдджык кылӧдны пурйӧн вӧлӧн кыскалӧм дорысь.

Видз-му юкӧд чукӧстчӧ став граждана дінӧдз, мед найӧ оз тыртны юяс лӧптӧн, мед чери кыян воджъяс идраласны кадӧн.

Обласьтувса видз-му юкӧд.