ГЫРЫСЯ ТУВЧЧАЛАМ ВОДЗӦ
Кӧкъямыс во нин коли Октябрса революция бӧрад. Воддза куим вонас Россияса уджалысь йӧз мырсисны мездысьны капиталистъясысь, помещикъясысь, фронтъяс вылын оружйӧӧн косясисны. Став вынсӧ, овмӧснысӧ пуктісны мездысян удж вылас. Империализм война^Сардырся, капиталистъяс горшлун вӧсна война./^ дырйиыд, мездысян война дырйиыд да, Россияыдлӧн овмӧсыс дзикӧдз киссьыліс, пазавліс.
Вӧрӧгъясысь мездысьӧм бӧрын уджалысь йӧз пырысь-пыр жӧ босьтчисны овмӧс кыпӧдан удж вылӧ. Мӧдісны уджавны пабрик-заводъяс, пондісны лэдзны крестьяналы колан тӧвар (уджалан кӧлуй, машинаяс, ситеч, сакар, быдсяма коланторсӧ). Крестьяна кутчысисны гӧр бердӧ...
Воысь воӧ кыптӧ, вынсялӧ Сӧвет Республикаяслӧн овмӧс.
Медым регыдджык, сюсьджыка пемыдысь, гӧльлунысь, тшыглунысь вермисны петны уджалысь йӧз, быд ас кывъя йӧзлы сетісны вӧля: ас кывйӧн, ас ногӧн, коді кыдзи вермӧ, кыдзи кужӧ, лӧсьӧдны ассьыныс овмӧснысӧ, вынсьӧдны, ёнмӧдны гӧгӧрбок.
Миян со, коми йӧзлӧн, асланым обласьт. Асьным ми зілям, мырсям овмӧснымӧс выль ногӧн лӧсьӧдны.
Ёна мырсям пемыдысь петны: восьтавлам челядьӧс велӧдан школаяс, гырысь йӧзӧс велӧдан школаяс и, лыддьысян керкаяс да. Ас коми кывйӧн велӧдчам сэні сюсьмӧдчыны быдсяма ногӧн.
Выль олӧмтӧ лӧсьӧдны ӧткӧн ӧд он вермы, сы вӧсна чукӧртчам кооперативъясӧ. Артельӧн, чукӧрӧн вынсьӧдам овмӧснымӧс.
Ньӧжйӧ, дерт, мунам ми водзӧтӧ. Другӧн ӧд пемыдсьыд он пет, другӧн он вуштышт важ олӧмтӧ. Первойтӧ тувччалам надзӧ. Сэсся ӧд та бӧрти восьлавны мӧдам нин гырыся. Кӧнсюрӧ сиктъясын эмӧсь нин миян электробияс. Кӧнсюрӧ эмӧсь нин котыра войтырлӧн заводъяс (вый вӧчан, сир вӧчан да мукӧд). Эмӧсь нин кӧнсюрӧ видз-му уджалан котыръяс (кооперативъяс).
Воысь воӧ, лунысь лунӧ сюсьмӧны коми йӧз, корсьӧны шыльыдджык туйяс. Коммунист партия сӧвет власьткӧд быдсяма ногӧн отсалӧны налы выль туй вылас петны: вынсьӧдӧ, ёнмӧдӧ кооперативъяс, восьталӧ удждысян банкъяс, лӧсьӧдӧ мӧда-мӧдлы отсасян комитетъяс, чинтӧ вотъяс, лэдзӧ тӧварлысь донъяс, лӧсьӧдӧ, судзӧдӧ видз-му уджалан машинаяс.
Отсалӧны коми йӧзлы пемыдысь, гӧльлунысь петны профсоюзъяс: велӧдысь котыр, агрономъяс, пельшӧръяс.
Бурмӧ, инасьӧ коми йӧзлӧн мудзӧм сьӧлӧмыс: водзын тыдалӧ нин югыд. Гырыся тувччалам водзӧ, повтӧг нин мӧдӧдчам овны.
Коми морт.
