КӦКЪЯМЫС ВО

Кӧкъямыс во сайын талунъя лунӧ рабочӧйяс крестьянакӧд вӧчисны Россияын революция: шыбитісны «Временнӧй правительство» (Керенскӧй вӧлі юралысьыс), мырддисны озыръяс кипод улысь власьт да лӧсьӧдісны выль власьт — Сӧветскӧйӧс.

Тайӧ революцияыс вӧлі октябр 25-ӧд лунӧ важ ногӧн, сійӧн и шусьӧ Октябрскӧйӧн.

Октябрса революция дзикӧдз путкыльтіс важ оласног (строй), сетіс став права да вӧля уджалысь йӧзлы лӧсьӧдны мӧд пӧлӧс оласног, стрӧитны выль государство. Октябрса революция ӧткодяліс Россияысь став мукӧд сёрниа посниджык йӧзӧс. Октябрса революция сетіс мужикъяслы кодь права жӧ уджалысь нывбабалы.

Кӧкъямыс во чӧж нин олӧ Сӧвет власьт. Эз кокньыд вӧв рабочӧйяслы да крестьяналы нинӧм абуысь стрӧитны му вылын вӧвлытӧм государство.

Нёль во чӧж Октябрса революция бӧрын муніс война — кыпӧдісны озыръяс. Найӧ кӧсйисны бӧр асланыс кипод улӧ ставсӧ босьтны. Налы отсасисны озыръяс (капиталистъяс) пӧшти став мукӧд государствоясысь — ӧтвылысь кавшасисны бырӧдны Сӧвет власьт.

Эз сетчыны рабочӧйяс крестьянакӧд. Найӧ сьӧлӧмсяньыс кыпӧдчисны видзны ассьыныс государствосӧ, Октябрса революцияӧн перйӧмсӧ. Найӧ вермисны озыръясӧс, весалісны врагъясӧс Сӧвет республикаысь.

Мӧд нёль восӧ на сӧмын ми мирнӧя олім-уджалім, кыпӧдім ассьыным государствонымӧс — ёнмӧдім Сӧвет власьт.

Мый вермис вӧчны Сӧвет власьт кӧкъямыс воӧн — ставсӧ артавны он вермы, ковмас висьтавны кузя, ковмас гижны уна нига. Видзӧдлам кӧ бӧрвылӧ да бурджыка артыштам, кутшӧм вӧлі олӧмыс кӧкъямыс во сайын и кутшӧм ӧні, ставным аддзам-гӧгӧрвоам — олӧм шензьымӧн ӧдйӧ бурмис. Быдӧн нин шуасны: «Важ серти ёна нин бура олам».

Сӧвет Республикаяслӧн Союз (СССР) ӧкмысӧд во кежлӧ бура нин ёнмис гӧгӧрбок — ортсысяньыс и пытшкӧссяньыс.

Мукӧд государствояскӧд волысьӧм (отношения), вузасьӧм-ньӧбасьӧм таво ёнджыка нин паськаліс. Пӧшти став государствоыс нин миянкӧд лыддьысьӧ, СССР-ӧс признайтӧ (пыдди пуктӧ). Кӧть сэтчӧс буржуйяс Сӧвет республика вылӧ синнаныс оз вермыны видзӧдны да, быть лоӧ: ӧти-кӧ, ми лоим ёнӧсь; мӧд-кӧ, налӧн оз тырмы сырьёыс (пабрик-заводъяс мыйысь вӧчӧны быдсяма тӧвар кӧлуй); коймӧд-кӧ, ассьыныс тӧвар кӧлуйсӧ этшалаӧ инавныс, оз кӧ СССР-ӧ тшӧтш вайны; нёльӧд-кӧ, сэтчӧс рабочӧйясыс найӧс тойлӧны (тшӧктӧны) миянкӧд бура волысьныс. Став рабочӧйыс сулалӧ миян дор.

Тайӧ вонас пӧшти быд государствосянь волісны СССР-лысь уджалӧмсӧ-олӧмсӧ видзӧдлыны рабочӧйяссянь делегацияяс. Найӧ ёна ошкисны миянлысь оласногнымӧс. Мунӧм бӧраныс висьтавлісны сэсся асланыс государствоса йӧзыслы став правдасӧ СССР йылысь, явитісны став лӧжсӧ буржуйяслысь.

СССР йылысь правдасӧ висьталӧм вӧсна, сы дор сулалӧм вӧсна да сійӧ туйӧд жӧ мунны лӧсьӧдчӧм понда буржуйяс быд ног дзескӧдӧны уджалысь йӧзӧс — виалӧны, тюрмаясӧ да катаргаясӧ мӧдӧдалӧны.

Став мувывса уджалысь йӧз видзӧдӧны СССР вылӧ югыд кодзув вылӧ моз; найӧ мездысьӧны озыръяс кипод улысь, зільӧны миян моз жӧ вӧчны революция. Талун найӧ думнаныс-сьӧлӧмнаныс тшӧтш миянкӧд празднуйтӧны.

Ми тайӧ ыджыд Октябрса праздниксӧ мӧдысь нин коллялам дона велӧдысьтӧгным — Ленинтӧг. Но ми сійӧ туйысь бокӧ эгӧ кежӧй, сылысь сиӧмъяссӧ (заветъяссӧ) эгӧ ордйӧй. Сы понда ми и вермим татшӧм регыдӧн справитны овмӧснымӧс да петны гӧльлунысь, кытчӧдз миянӧс воштыліс сизим вося войнаыд.

Ӧкмысӧд во вылӧ петігӧн ми нимкодя нин вермам шуны: Сӧвет власьт ёнмис. Быдпӧлӧс удж Сӧвет республикалӧн чорыда мунӧ. Ставсӧ стрӧитам асьным, бокисянь отсавтӧг. Миянӧс бура уджавны да выль олӧм вӧчны велӧдӧ оласногыс. Выль бур оласногыслысь туйсӧ водзӧ писькӧдӧ коммунист партия, Ленинлӧн партия.

Ӧкмысӧд во вылӧ петігӧн ми кӧсйысям чорыда нуӧдны водзӧ Ленинлысь шуӧмъяссӧ.

Мед олас, мед вынмас Сӧветса республика!

Мед лоас ставмувывса Октябр!