ВИСЕРЫН

(Кулӧмдін уезд)

Висерын му помысь крестьяналы нянь зэв омӧля локтӧ. Кыз нажӧткаыс налы локтӧ мукӧд уджысь, медъёнасӧ ур кыйӧмысь. Аслас няньыс зэв этшалӧн во гӧгӧрыс тырмӧ. Война дырйи Висерса крестьяна вывті ёна орліны. Война бӧрас прӧмыс вылӧ надеяӧн вузасян организацияясысь крестьяна зэв уна босьтавлісны сьӧм уджӧн. Мукӧдыс вӧлі босьталӧмаӧсь сё-мӧд шайтысь унджыкӧн. Крестьяналӧн став уджйӧзыс лыддьысьӧ 25 сюрс да 706 шайт. Сэсся уджӧн уна босьтавлісны «Дорйысь» нима удждысян тӧвариществолысь. Колян во крестьяна ур ньӧти эз вермыны кыйны. Таво крестьяна оз жӧ ошйысьны урӧн. Ӧні крестьяналы воис уджйӧз мынтан срок, а мынтыныс нинӧмӧн. Ог тӧд, кыдзи кутасны перйыны уджйӧзсӧ.

Коммунист ячейкаын куим морт, сӧмын ставыс воӧм йӧз. Вӧлӧсьтса крестьяна пиысь некод абу. Уджыс сэні некутшӧм оз мун. Тулыснас секретарас вӧлі кольӧмаӧсь Королёв ёртӧс. Юль тӧлысьӧ отпускас мунігӧн сійӧ нуӧма став делӧяссӧ да абу и бӧрсӧ ыстӧма. Асьсӧ ӧні служитӧмсьыс чӧвтӧмаӧсь. Комсомол ячейкаын 5 шлен. Ӧні йӧзыс ставыс вӧрынӧсь да, некутшӧм удж жӧ оз мун.

Сӧветӧ бӧрйӧм муніс таво бурджыка мукӧд вося дорысь. Войдӧр сиктъясын вӧліны собранньӧяс, кӧні висьтавлісны бӧрйысьӧм йылысь. Вӧлӧсьтын став бӧрйысьысьыс 1090 морт. Бӧрйыныс собранньӧяс вылӧ волісны 367 морт. Ӧні крестьяна ставыс вӧрынӧсь да этшаӧн волісны сӧветӧ бӧрйысигӧн. Мӧдысь кежлӧ эськӧ сӧветас бӧрйысян уджсӧ колӧ нуӧдны водзджык вежон кыкӧн кымын (1−15-ӧд лунъяс костын сентябр тӧлысьын) либӧ ноябр тӧлысьын, кор ставыс вӧрсьыс локтасны нин.

Рочев.