СӦВЕТӦ БӦРЙЫСЬӦМ АБЪЯЧОЙЫН

Абъячой вӧлӧсьтын (Сыктыв у.) Сӧветӧ бӧрйысьӧм удж эштіс октябр 12-ӧд лунын. Став йӧзыс вӧлӧсьтас 3376 морт, бӧрйысьысьыс 1790 морт. На пиысь Сӧветӧ бӧрйысян собранньӧяс вылӧ волісны 715 морт — 462 крестьянин да 253 нывбаба. Мӧд ногӧн кӧ шуны, бӧрйисны Сӧветӧ 40 прӧчент кымын став бӧрйысьысь йӧз пытшсьыс. Крестьяна ёна нин кутчысьӧны Сӧветӧ бӧрйысян уджӧ. Волсӧветса организационнӧй заседанньӧ вылӧ волісны морт сё кымын волсӧветӧ бӧрйытӧм крестьяна кывзыны вӧлӧсьтувса уджъяс йылысь. Сӧмын крестьяна оз на гӧгӧрвоны, кодъясӧс бурджык бӧрйыны Сӧветӧ. Сы вӧсна волисполкомӧ эз веськав ӧти гӧль морт.

Волисполкомӧ бӧрйӧм йӧз, буракӧ, кутасны омӧльджыка уджавны важ шленъяс дорсьыс. Но крестьянаыс кӧ кутасны отсавны волисполкомлы вӧлӧсьтувса удж нуӧдны да шленъясыс кӧ кутасны уджавны сьӧлӧмсьыныс, уджыс вермас бура сувтны.

Волсӧвет заседанньӧ вылын вӧчисны докладъяс уездувса исполкомъяс удж йылысь да волисполком удж йылысь. Уездувса исполком уджысь волсӧвет индаліс со кутшӧм омӧльджыкторъяс: больничаӧ ыстӧны зэв этша лекарствояс да мукӧд колан кӧлуйяс; агрономическӧй пунктъясӧ пукталӧны том, уджавны кужтӧм (малоопытные) агрономъясӧс; дыр оз мынтысьны крестьяналы туй вӧчӧмысь да мукӧдтор.

Волисполком удж йылысь доклад вӧчӧм бӧрын шуисны: 1) лӧсьӧдчыны мӧд во кежлӧ землеустройство нуӧдны; 2) кутчысьны ёнджыка удж нуӧдны волисполкомбердса секцияясын; удж нуӧдысьясас кыскыны велӧдчӧмджык йӧзӧс вӧлӧсьтсьыс; 3) нуӧдны мӧда-мӧдлы отсасян комитетӧ чукӧрӧн (коллективное) шленӧ пырӧм удж, 4) важ моз жӧ гырысь скӧтӧс быть ставыслы страхуйтны да мукӧдтор.

Сэсся крестьяна шуисны корны уездувса исполкомлысь да обласьтувса исполкомлысь шыбитны гырысь скӧтысь налог, тайӧ вӧлӧсьтас скӧтыс убытка вайӧ да. Скӧтсӧ пӧ тані видзӧны сӧмын куйӧд вӧсна. Крестьяналысь кӧ пӧ оз кутны скӧтысь босьтны налог, найӧ пӧ кутасны видзны уна скӧт да бурмӧдны ассьыныс муяссӧ. Сы бӧрын крестьяна ещӧ корӧны сетны сьӧм либӧ дон босьттӧг нуӧдны землеустройство.

Попов М.