ТЫРМАС ОЗ МИЯН НЯНЬ?

Урожай бур. Асланым нянь тырмӧ 7 тӧлысь кежлӧ.

Колян тӧв да тулыс коми крестьянин ёна вӧлі шогсьӧ урожай вӧсна. Тӧв вӧлі шоныд, тулыс кузь — уналаын ӧзимъяс тшыкины, уналаын лои мӧд пӧв кӧдзны. Кузя кӧть нюжаліс тулысыд, ёна кӧть поліс коми крестьянин да, тавося урожай воис ёна бур. Десятинаысь таво босьтӧны 63 пуд сю да 60 пуд ид — тайӧ шӧркодя кӧ лыддян (торъя кӧзяйствоясын босьтісны 100 пуд сю да 150 пуд ид). Ещӧ на миянлы колӧ Сибыр?! Сибырыс тай миян тані вӧлӧма. Ноко, 100 пудйӧн десятинаысь уналаын-ӧ Сӧвет республика пасьта босьтӧны? Позьӧ тай миян мутӧ уджавны.

Чукӧртӧма таво миян Коми обласьт пасьта сю — 655.142 пуд, ид — 788,755 пуд, зӧр — 90145 пуд, картупель — 1.540.490 пуд. Картупельсӧ кӧ да зӧрсӧ пӧртам нянь вылӧ, ставыс тавося урожай миян лоӧ 1835.770 пуд (сюӧн кӧ лыддьыны). Обласьт пасьта миян олысь 207.197 морт. Пуктам кӧ воӧн морт вылӧ 16,65 пуд, асланым нянь миян тырмас 7 тӧлысь кежлӧ.

Сыктыв уездын нянь тырмас во кежлӧ.

Уездъясын нянь запас абу ӧткодь. Медуна нянь миян Сыктыв уездын. Сэні кӧдзӧма вӧлі сю 5182½ десятина, урожайсӧ кӧ лыддям шӧркоддьӧмӧн 71,3 пуд десятина вылӧ — няньыд чукӧрмӧ 369.512,3 пуд; ид кӧдзӧма вӧлі 3834,4 десят., урожай 64,4 пудйӧн десятинаысь чукӧртӧма 245.785 пуд; 880,7 десятинаысь зӧр чукӧрмӧма 61649 пуд да картупель пуктӧма вӧлі 720,4 десятина. Урожай картупельлысь лыддьӧны 800 пудйӧн десятина вылӧ — ставыс лоӧ 576.320 пуд. Олысь Сыктыв уездын 77.656 морт. Нянь тырмас во чӧж.

Кулӧмдін уездын вермасны овны 8 толысь.

Кулӧмдін уездын кӧдзӧма вӧлі 2421,3 дес. сю, урожай 63 пудйӧн десятинаысь, чукӧртӧма нянь 152.541,9 пуд.; ид кӧдзӧма 4200,6 десятина, усьӧ 69 пудйӧн десятинаысь, лоӧ 289.800 пуд. Зӧр 325 десятинаысь чукӧрмӧма 23400 пуд. Картупель вӧлі пуктӧма 608,9 десятина, урожай 750 пудйӧн, чукӧрмӧма 456675 пуд. Олысь уездын 55,218 морт. Няньӧн судзсясны 8 тӧлысь (кӧйдыс вылӧ огӧ лыддьӧ).

Емдін уездын нянь этшаджык.

Кӧдзӧма вӧлі уезд пасьта сю 2463,8 десятина, урожай 50 пудйӧн десятинаысь, чукӧрмӧма сю 123,190 пуд. Ид вӧлі кӧдзӧма 3103,4 десятина, босьтӧны 57 пудйӧн — ставыс лоӧ 176,893 пуд. Зӧр 88,9 десятинаысь чукӧртчис 497,8 пуд. Картупель 446 десятина; чукӧрмӧма 355,175 пуд. Олысь Емдін уездын 47.882 морт. Нянь тырмӧ 6½ тӧлысь кежлӧ (кӧйдыс ог жӧ лыддьӧ).

Изьва-Печӧраын нянь тырмӧ сӧмын кык тӧлысь кежлӧ.

Сю кӧдза вӧлі 202 десятина, урожай лыддьӧны 49 пудйӧн, чукӧртӧма сю 9898 пуд. Ид 1816 десятинаысь чукӧрмӧма 76276 пуд, зӧр сӧмын 2,1 десятина — лои 117.6 пуд., картупель вӧдитӧны 287.2 десятина, воӧма 172,320 пуд. Олысь — 26,441 морт. Асланыс няньӧн оласны 2½ тӧлысь.

Бокысь вайӧма 1.100.000 пуд нянь. Юнь тӧлысьӧдз няньӧн олам.

Ми шулім нин, асланым няньӧн ми судзсям 7 тӧлысь кежлӧ. Колям кӧ сэтысь кӧйдыс вылӧ 960 пуд, миян нянь тырмӧ 5 тӧлысь кежлӧ. Сідзкӧ асланым нянь миян тырмӧ сӧмын выль воӧдз, колӧ кыськӧ бокысь вайны. Обласьтувса пытшкӧс вузасьӧм лӧсьӧдан юкӧд (Внуторг) мӧвпыштіс да шуис судзӧдны бокысь 1.200.000 пуд нянь. Обсоюз, Хлебопродукт, Госторг, Северолес вайӧмаӧсь нин октябр 1 лун кежлӧ Коми обласьтӧ 1.100.000 пуд. Та пиысь 200.000 пуд нуӧма Изьваӧ.

Вайӧм нянь тырмас квайт тӧлысь кежлӧ.

Ӧні мӧвпыштам: дыр-ӧ ми вермам овны няньӧн. Ми аддзылім нин: тавося урожай миян 1836 сюрс пуд, вайӧма нянь 1.100 сюрс пуд — став няньыс миян лоӧ 2.936 сюрс пуд. Сэтысь колям кӧ кӧйдыс вылӧ 374 сюрс пуд, коляс 2.561 сюрс пуд. Тӧлысь кежлӧ обласьт пасьта олысьяслы колӧ 287.5 пуд. Сідзкӧ став няньыс (ас урожай дай ӧнӧдз вайӧм нянь бокысь) тырмас 9 тӧлысь чӧж — юнь тӧлысьӧдз.