СБЕРЕГАТЕЛЬНӦЙ КАССА КОКНЬӦДӦ СЕЛЬХОЗНАЛОГ МЫНТЫНЫ

Уналаын нин восьталісны сберегательнӧй кассаяс. Кызыс сэтчӧ сьӧмсӧ пукталісны крестьяна. Найӧ гӧгӧрвоисны нин, мый сьӧм видзны гортын, кутшӧмкӧ пемыд пельӧсын, абу лӧсьыд.

Сэсся ӧні сберегательнӧй кассаяс отсалӧны крестьяналы сельхозналог мынтыны.

Сьӧм позьӧ пуктавны кассаӧ ичӧтикаӧн унаысь. Сійӧ сьӧм вылас пыр содӧ прӧчент. Сельхозналог мынтігӧн сійӧ прӧчентыс тшӧтш мунас сельхозналог мынтӧмӧ.

Сберегательнӧй кассаӧ сьӧм пуктӧмнас крестьянин кык бур вӧчӧ: сылы локтӧ прӧчент, дай государстволы пӧльза вайӧ. Государствоыс сійӧ сьӧмсӧ мыйкӧ дыра кежлӧ пуктылӧ коланінъясӧ.

Сберегательнӧй кассаяс пыр сельхозналог зэв жӧ кокньыд мынтыныс. Сельхозналог мынтысь, сылӧн кӧ эм сьӧм сберегательнӧй кассаын, мунӧ книжканас сберегательнӧй кассаӧ. Тшӧтш сыкӧд колӧ босьтны окладнӧй лист. Сберегательнӧй кассаын книжкасьыс чинтасны налог мынтӧм сьӧмсӧ да окладнӧй листас пасйӧны налогсӧ мынтӧм йылысь. Сэсся сберегательнӧй касса сетӧ квитанция налог мынтӧм йылысь. Сійӧ квитанцияыс и петкӧдлӧ налог мынтӧмсӧ.

Кутшӧм лунӧ сетасны сберегательнӧй кассаысь квитанция налог мынтӧм йылысь, сійӧ лунсяньыс и лыддьыссьӧ налог мынтан луныс.

Сельхозналог мынтӧм сберегательнӧй кассаяс пыр ёна кокньӧдӧ крестьянаӧс сельхозналог мынтігӧн.

К. Гамазин.