МЫЙ ВӦСНА ВОСЬТАЛӦНЫ СБЕРЕГАТЕЛЬНӦЙ КАССАЯС

Кык во саяс нин коли став Сӧвет республикаяс пасьта Трудӧвӧй сберегательнӧй кассаяс восьталӧм бӧрти. Сӧмын уна уджалысь йӧз на оз тӧдны бурлунсӧ да коланлунсӧ сберегательнӧй кассаяслысь, а коланлуныс да бурлуныс налӧн зэв ыджыд.

Миян государство зільӧ, мед эз сӧмын государственнӧй да кооперативнӧй организацияяс сьӧмыс муніс кӧзяйство кыпӧдӧм вылӧ, а тшӧтш став уджалысь йӧзыслӧн сьӧмыс отсаліс лэптыны миянлысь кӧзяйствосӧ. Сберегательнӧй кассаяс сулалӧны медматын уджалысь йӧз дінын. Найӧ медъёна вермасны чукӧртны уджалысь йӧзлысь сьӧм.

Войдӧрсӧ сберегательнӧй кассаяс вӧлі видзӧны сьӧмлысь дон усьӧмсӧ. Сэки вӧлі сьӧм доныс зэв ӧдйӧ усьӧ, а сберегательнӧй кассаӧ вӧлі босьтӧны донсӧ зарни вылӧ (зӧлӧта вылӧ) вуджӧдӧмӧн, сетӧны бӧрсӧ сэтысь сідз жӧ.

Ӧні сьӧмыдлӧн доныс оз нин усь. Сберегательнӧй кассаяслӧн лои ещӧ ыджыд удж — чукӧртны уджалысь йӧзлысь сьӧм, кыдз войдӧр нин висьталім, ассьыным промышленносьт да сельскӧй кӧзяйство лэптыны.

Уджалысь йӧзлы сберегательнӧй кассаясӧ сьӧм пуктӧмысь уна бур локтӧ. Ӧти-кӧ: пуктӧм сьӧм вылӧ сетӧны прӧчент; сэсся сберегательнӧй кассаяс велӧдӧны уджалысь йӧзӧс бура пӧльзаӧн ассьыныс сьӧм видзны. Сідзи сьӧм чукӧртӧмӧн уджалысь йӧз вермасны лӧсьӧдны колан уджалан кӧлуйяс да мукӧдтор.

Сберегательнӧй кассаясын сьӧм видзӧмӧн уджалысь йӧз сетӧны ассьыныс сьӧмсӧ мыйкӧ дыра кежлӧ государстволы пӧльзуйтчыны, лэптыны уджалысь йӧзыслысь жӧ овмӧссӧ.

Корнилов.