КОММУНИСТ ПАРТИЯ КРЕСТЬЯНА ВӦСНА ТӦЖДЫСЬӦ

Центральнӧй Комитетса пленум чукӧстчӧм йылысь

Тайӧ лун-вой Россияса Коммунист Партия Центральнӧй Комитетлӧн чукӧртчыліс пленум. Пленумыс аслас уджъяссӧ нуӧдӧм бӧрти чукӧстчис став организацияяс дінӧ, коммунист партияса шленъяс дінӧ.

Чукӧстчӧмас медвойдӧр висьтавсьӧ, кутшӧм удж нуӧдіс Коммунист партия да мый артмис сійӧ удж нуӧдӧмсьыс. Сэсся висьтавсьӧ, кутшӧм удж да кыдзи водзӧ кежлӧ нуӧдны. Медъёнасӧ тайӧ чукӧстчӧмас висьтавсьӧ крестьяна пӧвстын удж нуӧдӧм йылысь, кыдзи налысь овмӧссӧ лэптыны, кыдзи ӧтувтны, медым ставнысӧ найӧс кыскыны социализм уджӧ.

Ми тані дженьыдика висьталам чукӧстчӧм йывсьыс.

Овмӧс миян кыптӧ. Крестьяналӧн олӧм бурмӧ. Найӧ босьтчӧны политика уджӧ.

Мый артмис партияӧн удж нуӧдӧмысь, кутшӧм миян, сӧвет власьтлӧн, овмӧсным?

Миян государствоса промышленносьт таво ёна ёнмис. Кок йылас сувтан уджыс сылӧн кутіс помасьны. Сы вӧсна водзӧ кежлӧ ковмас нуӧдны ёна ыджыд удж: медым промышленносьтӧс, сыкӧд став кӧзяйствонымӧс сувтӧдны бурджыка техникаӧн ӧнія дорысь. Тайӧ уджсӧ вермам нуӧдны сӧмын сэки, миян кӧ видз-му уджалӧм тшӧтш кыптас. Партия дай сӧвет власьт ёна кокньӧдӧны быд боксянь, медым ӧдйӧджык эськӧ кыптіс видз-му уджалӧмыс. Тавося бур урожай ещӧ нин ёна тойыштіс миянлысь кӧзяйствонымӧс, уджнымӧс кыптӧм вылӧ.

Кӧзяйство кыптӧм вӧсна, бурмӧм вӧсна олӧмыс рабочӧйлӧн да крестьяналӧн бурмис. Водзӧ кежлӧ налӧн олӧмыс ещӧ бурмас. Кӧзяйство бурмӧмкӧд тшӧтш ӧтпырйӧ крестьяна зільӧны кутчысьны политика уджӧ. Ӧнія кадын крестьяна пыр ӧтарӧ ёнджыка кыскыссьӧны сӧветъяс уджӧ, кооперативӧ, мукӧд сиктса организацияясӧ.

Сиктъясын босьтчӧны политика уджӧ кулакъяс (активность кулака), босьтчӧны шӧркоддьӧма олысьяс, босьтчӧны гӧль крестьяна. Сӧмын гӧль крестьянаӧн политика уджӧ босьтчӧмыс мунӧ ньӧжйӧнджык. Сы вӧсна некымынлаын сӧветъясӧ бӧрйысигӧн кулакъяс ёнджыка тӧдчанаӧсь вӧліны шӧркоддьӧм да гӧль крестьяна дорысь. Ӧтпырйӧ ёнмисны партиялӧн организацияясыс. Найӧ вермисны ӧтувтны гӧль крестьянаӧс, медым гӧль крестьянаыс ӧтув шӧркоддьӧма олысь крестьянакӧд вӧліны ыджыдӧсь сӧветъясын, кооперативъясын, медым найӧ вӧліны сиктса олӧмӧн бергӧдлысьясыс.

Кӧзяйство кыптӧмыс, йӧзӧн уджӧ босьтчӧмыс индылісны партиялы сизимӧд съездсяньыс — код ногӧн сылы колӧ нуӧдны уджсӧ.

Кутшӧм удж колӧ водзӧ нуӧдны.

Пленум аслас чукӧстчӧмас индӧ, кутшӧм удж водзӧ кежлӧ сувтӧ партия водзын. Медтӧдчана да ыджыд уджыс ӧнія кадын колӧ лоны со кутшӧмъяс:

Ловзьӧдны (оживить) сӧветъяс каръясын дай сиктъясын, кыскыны сӧветъясӧ уджавны шӧркоддьӧма да гӧль крестьянаӧс. Ёнмӧдны ӧтувтчӧмсӧ рабочӧйяслысь шӧркоддьӧма да гӧль крестьянакӧд.

Кооперацияӧс ловзьӧдны, паськӧдны уджсӧ, крестьянаӧс кыскыны кооперацияӧ. Каръяслӧн сиктъяскӧд тӧргӧвӧй ӧтувтчӧмыс пыр ӧтарӧ ёнмӧ. Сы вӧсна кооперациятӧ сиктъясын ловзьӧдӧмыд ёна ыджыд удж.

Деревняса гӧль крестьяна пӧвстын удж йылысь пленумлӧн резолюцияыс тшӧктӧ веськыда нуӧдны уджсӧ, оз лэдз бокӧ кежны. Бокӧ кежӧмъясыс вермасны лоны со кутшӧмъяс: кулакъяс кыптӧм вылӧ омӧльджыка видзӧдлӧм, найӧ кыптӧмысь повзьӧм. Ми кӧ веськыд туйсьыс кежам, сэки вермас бӧр орны рабочӧйяслӧн гӧль да шӧркоддьӧма крестьянакӧд ӧтувтчӧмыс. Тайӧ бокӧ кежӧмъясыскӧд партия ёна кутас вермасьны. Партиялӧн удж нуӧдӧмыс петкӧдліс — деревняын, крестьяна пӧвстын сӧвет власьт вылӧ бура кутісны видзӧдны. Сы вӧсна татшӧм сяма уджыс лоӧ нуӧдӧма партияӧн и водзӧ.

Со мый шуӧ пленум аслас чукӧстчӧмын. Та серти позьӧ аддзыны: Коммунист партия зільӧ сӧмын рабочӧйяс вӧсна, гӧль да шӧркоддьӧма крестьяна вӧсна, кокньӧдӧ налысь олӧмсӧ, индӧ туй бур олӧмлань мунны.

Крестьяналы колӧ сьӧлӧмсянь босьтчыны уджавны да овны Коммунист партия туйдӧдӧм серти.