СЕЛЬКОРЪЯС ГИЖӦДЪЯС ВЫЛӦ ШЫӦДЧӦМЪЯС

«Югыд туйын» 166-ӧд №-ын, август 13-ӧд лунӧ вӧлі печатайтӧма селькор Лежнӧглысь гижӧд Ыбын (Емдін уездын) налог унджык пуктӧм йылысь. Тайӧ гижӧд кузяыс обласьтувса прокурорлӧн отсасьысьыс 4-ӧд участокысь юасьлӧма Емдінса фининспекторлысь да тшӧктӧма вӧлі сылы тӧдмавны Ыбса исполкомысь, збыль-ӧ налогсӧ унджык пуктӧма. Збыль кӧ, тшӧктӧма вӧлі муяссӧ муртавны (мерайтны) да сы серти налогсӧ пуктавны. Фининспектор тшӧктӧма Ыбса исполкомлы му-видзсӧ муртавны крестьяна тшӧт вылӧ дай налог лыдсӧ сы серти вежны. Та вылӧ Ыбса исполком юӧртӧ: сьӧмсӧ пӧ видз-мусӧ мурталӧмысь некод оз сет. Налогсӧ пӧ пуктӧма Ыбса исполкомӧн колян вося видз-му список серти. Быдлаын пӧ тадзи вӧчсьӧ, кӧнъясӧн эз вӧвны юклысьӧмъяс. Тадзисӧ вӧчны тшӧктӧ закон.

***

Сійӧ жӧ газет 166-ӧд №-ын «Ми кылам»-ын вӧлі печатайтӧма селькор Сьӧд кымӧрлысь Отса (Емдін уездувса) исполкомын секретар Полугрудов йылысь: сійӧ пӧ дзонь тӧлысь абу волӧма исполкомас. Прокурорлӧн отсасьысьыс юалӧма та йылысь да, сылы юӧртӧмаӧсь: Полугрудов ёрт пӧ юль 13-ӧд лунсянь август 4-ӧд лунӧдз петалӧма отпускӧ. Сэк кості сылысь уджсӧ нуӧдӧма Козлов ёрт. Вӧлӧмкӧ, Сьӧд кымӧр абу лючки тӧдмалӧма да гижӧма газетӧ.