ЧИТАЁВЫН

Читаёв вӧлӧсьтын сӧветӧ бӧрйысян удж помасис октябр 18 лунӧ. Бӧрйысян уджсӧ нуӧдіс Визин уездувса исполкомысь секретарыс Попов М. Сиктъясын бӧрйысян собранньӧяс вылӧ крестьяна волісны 50 прӧчентсянь 35 прӧчентӧдз. Бӧрйисны сӧветӧ вит сиктын. Ставсӧ вӧлӧсьтувса сӧветӧ бӧрйисны дас вит мортӧс. На пиын эмӧсь комсомолечьяс да коммунист партияысь кандидатъяс. Ӧти нывбаба сӧветӧ эз веськав. Уездувса исполком удж йылысь доклад вӧчӧм бӧрын крестьяна шуисны: исполком пӧ уджалӧма шӧркоддьӧма, сӧмын пӧ водзӧ кежлӧ пемыдджык сиктъяс вылӧ колӧ ёнджыка исполкомлы видзӧдлыны, коланінъясӧ пӧ колӧ лӧсьӧдны пельшӧрскӧй пунктъяс, мед пӧ агрономъяс ёнджык отсӧг сетасны крестьяналы, зільны пӧ колӧ содтыны вӧр лэдзӧмысь дон да мукӧдторъяс. Крестьяналы зэв сьӧлӧм вылас воис, уездувса исполкомыд аслас удж йывсьыд висьталіс налы да.

Волисполком доклад кузя крестьяна шуисны: водзӧ кежлӧ пӧ водзджык колӧ сетавны крестьяналы окладнӧй листъяс, лӧсьӧдны пӧ колӧ кӧйдыс запас (семеннӧй фонд), пӧжар кусӧдан кӧлуй пӧ колӧ бурджыкӧс лӧсьӧдны да сідз водзӧ.

Вӧлӧсьтувса исполкомӧ бӧрйисны куим мортӧс: ӧтикыс коммунист партияысь кандидат, мӧдыс беспартийнӧй, коймӧдыс комсомолеч, неважӧн локтіс Гӧрд армияысь. Исполкомса юралысяс веськалі комсомолечыс. Крестьяна зэв надейтчӧны тайӧ ёртъяс вылӧ.

Брат.