АЙКАТЫЛАСА ПОТРЕБОБЩЕСТВО ЁНМӦ

Айкатылаын (Емдін уездын) потребительскӧй обществоыс уджсӧ нуӧдӧ 11 сиктын. Тайӧ 11 сиктас 1171 керка.

Тайӧ вонас уджыс потребобществолӧн ёна ёнмис. Колян воӧ октябр 1-ӧд лун кежлӧ став шленыс вӧлі 200 морт, на пиын 17 нывбаба, таво октябр 1-ӧд лун кежлӧ жӧ став шленыс лоӧ 304 морт, нывбабаыс на пиысь 56 морт — 31% став керка юр пытшсьыс.

Ӧти воӧн потребобщество лӧсьӧдліс тӧваръяссӧ 52 сюрс шайт дон. Куш барыш во чӧжнас лои 3415 шайт да 5 ур. Основнӧй капиталыс 2189 ш. да 99 ур, паевӧйыс 864 шайт. Мукӧд кооперативъяс серти крестьяналы колан тӧваръяс ёна донтӧмӧсь. Тӧваръяссӧ судзӧдӧ Яткаса синдикатысь, Котласысь, Архангельскысь, Сыктывдінкарысь.

Октябрын потребобществоса шленъяслӧн вӧлі собранньӧ. Сэні бӧрйисны обществоас бӧр важ правленньӧса шленъяссӧ (3 мортӧс). Собранньӧ тшӧктіс правленньӧлы ёнджыка кутчысьны йӧзӧс югдӧдан уджӧ. Сэсся шуисны барышсьыс пуктыны 1% — 34 ш. да 15 ур — «Коми морт» нима аэроплан вылӧ. Студентъяслы отсӧг вылӧ шуисны сетны барышсьыс ¾% — 25 ш. да 62 ур.

Айкинаса потребобществолӧн эм Семуков сиктын отделенньӧ. Сійӧ вӧчӧма оборотсӧ 3300 шайт саяс.

Кор Айкинаса кооператив первойсӧ на кутіс кок йылас сувтны, частнӧй тӧрговечьяс — «тӧчилаяс», Сьӧд юр Педьяс — зільлісны быд ногыс путкыльтны сійӧс, ляскавлісны сюръяясӧ весиг гижӧдъяс, медым йӧзыс оз пырны шленӧ кооперативас. Сӧмын крестьянаыд эз кывзыны налысь. Ӧні сэтшӧм лёк йӧзыс зільӧны пырны асьныс кооперативӧ шленъясӧн. Оз ков лэдзны сэтшӧм лёк йӧзтӧ кооперативӧ.

Айкалӧн вокыс.