ГАЗЕТ ЛЭДЗАНІНЛӦН ВЕЖОН ЧӦЖӦН УДЖЫС

«Югыд Туй» газет лэдзанінӧ быд лун воӧ зэв уна письмӧ. Уджалысь йӧз гижӧны газетӧ ассьыныс сиктса олӧм йылысь, мый буртор эм, мый омӧльыс, кутшӧма волисполкомъяс, кооперативъяс, школаяс уджалӧны. Став гижӧдъяссӧ, дерт, он вермы газетад лэдзны: уна письмӧ шогмытӧмла оз сюр газетад — зэв нин посниторъяс йылысь мукӧдыс гижӧны, уна письмӧ ми мӧдӧдам учрежденньӧясӧ справкаясла да сэсся пошта куд пыр сетам юӧр. Унджык письмӧыс пырӧ газетӧ. Мед эськӧ газетӧ гижысьясыс тӧдӧны, кытчӧ воштім налысь письмӧсӧ, ми пошта куд пыр быдӧнӧс юӧртам. Сэсся ӧні октябр тӧлыссянь шуим быд вежонӧ ӧтчыд газетын лэдзны отчёт газет лэдзанінын вежон чӧж удж йылысь. Сідзинад гижӧдъясыд оз вошны, деревняса письмӧясӧн газетным ёнмӧ.

Колян вежоннас (октябр 16−23 лунӧ) со мый газет лэдзанінын лои уджалӧма: селькоръяссянь воис 73 письмӧ (рӧспута понда ӧні письмӧ воис этшаджык колян вежонся), на пиысь 40 письмӧ лэдзӧма газетын, 17 письмӧ мӧдӧдӧма учрежденньӧясӧ, 16 письмӧ шогмытӧмла абу лэдзӧма газетӧ да юӧртӧма пошта куд пыр.