ДЫР-Ӧ НӦ ОЗ ЛО ШКОЛАЫС?

Вомынын, Айкина вӧлӧсьтын (Емдін уезд) 1920 восянь нин абу школа. Гӧль крестьяналӧн челядь оз вермыны ветлыны Айкинаса школаӧдз — нёль-вит верст сайӧ. Уна во нин волсъезд вылын вӧлі та йылысь сёрни, но мыйкӧ тай нинӧм на огӧй аддзӧ-а. Таво кежлӧ (1925−26 во вылӧ) Обисполком пӧ эськӧ шуӧма восьтыны, да вомынса крестьяна оз тӧдны, кор лоӧ. Менсьым юасьӧны пыр: дыр-ӧ нӧ пӧ оз восьтыны школасӧ? Челядь пӧ кольӧны воысь воӧ велӧдчытӧмӧсь. Став челядьыс нелямын кымын.

Сэсся ӧні гӧрдармеечьяс локтісны; найӧ пырысь-пыр жӧ пондісны тӧждысьны школа йылысь: миян пӧ Вомынын (нёль деревня) йӧзыс пондісны кольны мукӧд сиктъясысь.

Абу пӧ школа ни, лыддьысян керка ни. Колӧ миянлы школа, школаас пӧ восьтам лыддьысян керка. Ми пӧ уна нига вайим, Гӧрд армияысь — гӧснеч крестьянаӧс югдӧдны.

Сыспи Вань.