ПОТРЕБИТЕЛЬСКӦЙ ОБЩЕСТВО УДЖАЛӦ ОМӦЛЯ

Дереваннӧйын (Кулӧмдін у.) потребительскӧй общество уджалӧ зэв омӧля. Ӧні вогӧгӧрся учёт дырйи приказчикыс абу судзсьӧма 301 шайт да 27 ур. Обществолӧн вогӧгӧрся оборотыс 45 сюрс шайт. Барышыс колӧ лоны 330 шайт. Тӧвар босьталӧмысь шленъяслы колӧ сетны 448 шайт. Сідзкӧ вогӧгӧрся вузасьӧмысь потребительскӧй обществолӧн лоӧма убытка 72 шайт. Лавкаас приказчик кындзиыс корсюрӧ вӧлӧм вузасьӧны правленньӧса шленъясыс дай стӧрӧжыс. Кывтыдпомса отделенньӧын лавканас заведуйтысьыс абу жӧ судзсьӧма 34 шайт да 32 ур дон. Сэсся главнӧй лавкаыс отделенньӧыслы мукӧддырйиыс оз сет колан тӧварсӧ. Сы вӧсна унаысь овлӧны зыкъяс. Обсоюз тшӧктӧма вӧлі лӧсьӧдны лавочнӧй комиссия, да мыйлакӧ ӧнӧдз на эз лӧсьӧдны.

Г-г.