ВОЛСЯЫН

(Сыктыв уездын)

Сӧветын удж нуӧдысьяс.

Сентябр кӧкъямысӧд лунсянь исполкомын уджалӧны выль шленъяс. Председательыс Сенькин И. ветлӧм-мунӧм морт; 1921−1922ʼ воясын уджавліс Сыктывдінкарса Видз-му юкӧдын. Ӧні сійӧ тӧдмасьӧ на уджнас. Кыдзи кутас уджавны — нинӧм на шуны оз позь. Самӧкурсӧ кӧ видлалӧмысь дугдас, позьӧ надейтчыны бура уджалӧм вылӧ. Председательсӧ вежысьыс нывбаба Пилатова О., прӧстӧй крестьянка, войдӧрджыксӧ некӧн на эз уджавлы. Удж дінӧ кутчысьӧ сьӧлӧмсянь, сӧмын омӧля велӧдчытӧмысла дыр лоӧ тӧдмасьны сылы уджнас.

Секретарас коли важыс, Кушманов ёрт.

Кутам виччысьны выль шленъяслысь бур удж.

Школаясын удж.

Таво вӧлӧсьтӧ восьтісны 4 школа, велӧдысьыс сизим морт. Школаясын велӧдчӧны 280 кымын челядь. Крестьяна школа вылӧ видзӧдӧны бура. Сӧмын велӧдысьясыс дышӧдчыштӧныджык. Колян во нин газетӧ гижлісны, колӧ пӧ чукӧртлыны сёрнитны велӧдчысьяслы бать-мамнысӧ, да ӧнӧдз на велӧдчысьяс эз чукӧртлыны. Таво велӧдчыны школаясын заводитчигӧн Вадыб школаын велӧдысь Попов кындзи велӧдысьяс эз чукӧртлыны сиктъясын скодъяс. Скодъяссӧ кӧ эськӧ вӧчлісны, крестьянаыс вермисны унджык челядьӧс ыстыны школаясӧ.

Лыддьысян керка.

Тулыссяньыс лыддьысян керкаын вежсис коймӧд юралысь нин. Ӧні уджалӧ Сыктывдінкарса педтехникум кончитӧм морт, Мальцев ёрт. Уджалӧ эськӧ сьӧлӧмсяньыс, да бурсӧ вӧчныс эз на нинӧм вермы. Сӧвет власьтлысь да партиялысь уджсӧ омӧля на велӧдӧма. Август 20-ӧд лунсянь пыр на мыйкӧ нигаяс лӧсьӧдліс.

Пельшӧрскӧй пункт.

Тулыссяньыс пельшӧрскӧй пунктын 3-ӧд пельшӧр жӧ нин. Ӧні сентябр 9-ӧд лунсянь уджалӧ роч морт Полещикова. Норасьӧ лекарствояс абутӧм вылӧ. Кыдзи кутас уджавны водзӧ — ог тӧд, сӧмын тай, тыдалӧ, мавтасъястӧ лекарствояс вылад босьталӧ-а. Ӧти тьӧтка висьталӧ: нулі пӧ кагаӧс пельшерича дінӧ кыкысь, сетліс пӧ кутшӧмкӧ лекарство, сӧмын пӧ отсӧг некутшӧмӧс лекарствоыс эз сет. Сэсся пӧ нуи нёль кольк да, пырысьтӧм-пыр пӧ сетіс мӧд лекарство, кагаыс пӧ кык лун мысти бурдіс. Колӧ пельшеричаӧс чирыштны татшӧм уджысь.

Пурга.