ИЗЬВАЙЫВСА ПОТРЕБИТЕЛЬСКӦЙ ОБЩЕСТВО УДЖАЛӦ БУРА

Изьвайывса потребительскӧй общество воссис 1920 воын. Воссигас капиталыс сылӧн вӧлі 48 шайт. Обсоюз отсалӧмӧн потребительскӧй общество заводитіс ваявны изьвайывса крестьяналы сӧмын налы колан тӧвар. Крестьяна гӧгӧрвоисны потребительскӧй обществолысь бурсӧ, заводитісны быд ногӧн отсавны сылы. Ӧні изьвайывса крестьяна видзӧдӧны потребительскӧй общество вылӧ асланыс овмӧсыс вылӧ моз. Уджыс потребительскӧй обществолӧн пыр бурмӧ. Изьвайыв вӧлӧсьт эськӧ зэв паськыда пукалӧ дай олысьыс сэні этша (123 торъя овмӧс), да потребительскӧй обществоӧ гижсис нин 229 морт. Шленскӧй взносыс 5 шайт. Бӧръя кадас крестьяна дінӧ тӧвар ёнджыка матыстӧм кузя общество восьтіс Латш сиктӧ отделенньӧ. Сэні во 30 кымын нин ылӧдліс крестьянасӧ вузасьысь Як Вань. Ӧні отделенньӧ восьтӧм бӧрын сійӧс ёна топӧдіс.

Обществолӧн эм мельнича, кык керка (лавкаяс улас) да амбаръяс. Сэсся быд сиктӧ судзӧдӧ кӧкъямыс журнал да газет. Вайныс эськӧ тӧварсӧ лоӧ 250 верст сайысь, гожӧмын шоръяс кузя, посньыдик юяс кузя, мукӧддырйиыс пуд вылӧ вайӧмсьыс лоӧ вӧлі сетны 3 шайт да 50 ур, да содтӧдсӧ тӧвар вылас вузалігӧн став накладнӧй рӧскоднас общество пуктӧ сӧмын 15−16 прӧчент. Крестьяналӧн таво вӧралӧм кындзи некутшӧм нажӧтка эз вӧв, нянь воліс омӧлик жӧ, но оборотыс потребительскӧй обществолӧн воӧн (октябр 1924 восянь октябр 1925 воӧдз) лои 239.174 шайт да 22 ур.

Правленньӧса юралысь Уляшов.