КАРТУПЕЛЬ — БУР КӦРЫМ СКӦТЛЫ

Кыдзи кутшӧм скӧтӧс вердны

Картупельыд абу сӧмын куш йӧзлы колан сёянтор. Зэв бур вердантор сійӧ тшӧтш скӧтлы. Пӧтлуныс картупельын эм жӧ: 3½−4 пунт картупель водзсасьӧ 1 пунт пызькӧд, 1 пунт нянь туськӧд либӧ ӧтрубъяскӧд.

Картупельӧн вердӧны скӧтӧс, медым найӧ унджык йӧв сетасны. Сэсся вердӧны унджык яй да гос (сала) вылӧ.

Унджык йӧв вӧсна мӧсъястӧ колӧ вердны путӧм (уль) картупельӧн вундалӧмӧн. Вундавтӧдзыс войдӧр колӧ кӧтӧдны кӧдзыд ва пиын. Картупельӧн шӧркоддьӧма вердігӧн мӧслӧн йӧлыс тӧдчӧмӧн содӧ. Лун кежлӧ мӧслы картупельтӧ оз ков сетны 25−30 пунтысь унджык. Сыысь кӧ унджык кутан вердны, мӧскыдлӧн йӧлыс дай выйыс лоӧ чӧскыдтӧм кӧра.

Кынмылӧм картупельӧн мӧстӧ оз позь вердны. Сійӧн вердӧмӧн тыра мӧсъяс вермасны вайны шой. Куканьясӧс картупельӧн дзик ньӧти оз позь вердны.

Вердны кӧ кутан мӧсъястӧ пуӧм картупельӧн, сылӧн йӧлыс чинӧ, сы пыдди весыс сылӧн содӧ дай лоӧ сыладжык. Сідзкӧ яй вылӧ скӧтӧс видзигӧн колӧ найӧс вердны пуӧм картупельӧн. Гырысь скӧтлы колӧ сетавны лун кежлӧ 50 пунт картупель, ыжъяслы 5 пунт, порсьяслы 20 пунтӧдз.

Порсьясӧс вердны колӧ сӧмын пуӧм картупельӧн. Колӧ вердны порсьпиянӧс дай гырысь порсьясӧс яй вылӧ да гос вылӧ. Гос вылӧ порсьӧс быдтігӧн колӧ вердны найӧс медъёнасӧ картупельӧн арӧн-джынйӧнсянь кык арӧсӧдз дай вердны помвыв куим-нёль тӧлысь. Картупель кындзи колӧ тшӧтш порсьяслы сетавлыны чорыд кӧрымъяс (турун, мукӧдтор).

Ст.